Այսօր, առավել քան երբևէ, անհրաժեշտ է ուժ և միասնականություն. Նաիրի Սարգսյանի շնորհավորանքը

Սակայն այս տարի այն նշում ենք նաև մեծ ցավի զգացումով. 2023 թ. Արցախի կորստով բեկվեց հայոց պետականության մի կարևորագույն հենասյուն: Նշենք, որ Արցախյան ազատագրական, 1988-ից մեկնարկած պայքարը Հայաստանի անկախության գործընթացի սկիզբը դրեց, և մենք դա չենք մոռանում:

Այսօր՝ Արցախը կորցրած, գործող ապիկար իշխանությունների քաղաքականության հետևանքով թուլացած ու խոցված մեր երկիրը կանգնած է լրջագույն նոր մարտահրավերների առաջ։ Մարտահրավերներ, որոնք կարող են վնասել մեր պետականությանը և անկախության հիմնասյուներին:

Սակայն մենք լիահույս ենք և անհրաժեշտ պայքարի կամքով ու հավատամքով լի, որ ապաշնորհ իշխանությունների գոյության փաստով ու որդեգրած քաղաքականությամբ չէ միայն, որ պայմանավորվելու է հայկական պետության ներկան ու ապագան։

Հայաստանի անկախ հանրապետությունը մեր ժողովրդի հավաքական ուժի, աննկուն կամքի և սեփական ապագան կերտելու ինքնիշխան իրավունքի արտահայտությունն է:

Չնայած այսօրվա ծանր վիճակին՝ մենք շարունակում ենք հավատալ մեր հայրենիքի հաղթական, պայծառ ապագային:

Անկախությունը մեզ պարտավորեցնում է հանուն ապագայի վերականգնել մեր արժանապատվությունը, ամրապնդել ազգային ինքնությունը և համախմբվել հանուն Հայաստանի և Արցախի:

Այսօր, առավել քան երբևէ, անհրաժեշտ է ուժ և միասնականություն, որպեսզի կարողանանք կառուցել այն Հայաստանը, որի մասին երազում էինք 1991 թվականին։