«Վերջ տվեք էդ մեյմուն արարքներին, թող մարդիկ հելնեն»

«Փաստ» օրաթերթը գրում է.

Սարի թաղում հուլիսի 19–ին տեղի ունեցած դեպքերով 10 կալանավորվածների հարազատներն արդեն երկու շաբաթ է Գլխավոր դատախազության շենքի դիմաց նստացույց են իրականացնում: Վերջինները պահանջում են փոխել 316–րդ հոդվածը: Քրեական գործով կալանավորված Էդուարդ Զեյթունյանի կինը՝ Լալա Բերնեցյանը, «Փաստի» հետ զրույցում նշեց, որ նախորդ շաբաթ իրենց հետ հանդիպման ժամանակ գլխավոր դատախազը խոստացել էր պատիժը պայմանականորեն չկիրառել և տղաներին դահլիճից ստորագրությամբ բաց թողնել, եթե նրանք ընդունեն իրենց մեղքը: Սակայն այս առաջարկը կալանավորների հարազատներին չի գոհացնում:

«Դատախազության պատերի տակ 2 շաբաթ նստել ենք: Ես ապշած եմ էս իշխանության վրա: Չե՞ն տեսնում, որ կինարմատ են, մայրեր ու տատիկներ: Մենք էլ ենք ուզում ապրել, մենք էլ ուզում մեր ամուսինները մեր կողքին լինեն: Եթե ոստիկանը համազգեստ ունի, կարո՞ղ է իրեն ամեն բան թույլ տալ, բայց հասարակ քաղաքացին, որ իջել է իր ճանապարհն ու տրանսպորտը պահանջելու՝ ոչ: Կարելի՞ է նրան ծեծել, նվաստացնե՞լ ու հետո 5–10 տարվա հոդվածով դատե՞լ»,– վրդովված ասաց Լալա Բեռնեցյանը:

Սարիթաղցիների գործով վերջին դատական նիստը 2 օր առաջ էր կայացել: Արդյունքում ոչ մի նոր որոշում չի կայացվել, ոստիկաններից մեկն է ցուցմունք տվել, 3 անգամ, 3–ն էլ՝ տարբեր:

«Ի՞նչ է նշանակում ոստիկանի ցուցմունքի վրա մարդուն 5–10 տարի դատելը, հո Սիցիլիան չէ՞: Կլոունադա է, ի՞նչ է: Երեկ ցուցմունք տված ոստիկանը ոչ մեկին չի ճանաչում, իրեն չեն տեսել, բայց հայտնվել է այդտեղ, ի՞նչ է դա նշանակում: Վերջ տվե՛ք էդ մեյմուն արարքներին, թողե՛ք մարդիկ հելնեն: Ահավոր է մեր վիճակը: Երեկ հոսանքն են անջատել: 7 տարեկան էրեխեն մնացել է մենակ տանը: Ես ի զուր տեղը չեմ բարձրաձայնում, գնում նստում դատախազության շենքի առաջ: Էդ ա իմ վիճակը: Միայն ես գիտեմ իմ ծանր սոցիալական վիճակը, երկրի ղեկավարներից ոչ ոք չգիտի»,– պատմեց նա:

Ապա շարունակեց, որ երեկ նստացույց չեն արել, որոշել են բոլորով հավաքվել, ընդհանուր հայտարարի գալ՝ որոշելու համար, թե ինչպես պիտի շարունակեն իրենց պայքարը: Լալա Բեռնեցյանը նաև նշեց, որ եթե շարունակվի նույն անտարբեր վերաբերմունքը իրենց նկատմամբ, իրենք պատրաստ են անգամ երեխաների հետ ցույցի գնալ:

«Եթե իրենք շարունակեն անտարբեր մնալ, մենք նույնիսկ երեխաների հետ ենք գալու, տալու ենք ձեռքները էդ երեխեքին, ասենք պահե՛ք, կերակրե՛ք, խմացրե՛ք մինչև իրենց պապաներին կբարեհաճեք դուրս հանել: Քաշե՛ք էդ հոգսը: Թող տանեն, պահեն, որ զգան, թե մեր վիճակը ինչքան ծայրահեղ է, որ եկել–հասել ենք իրենց դուռը, իրենցից ինչ–որ բան ենք խնդրում: Եթե չեն ուզում, որ մենք նստենք այնտեղ, իրենց դեմքը աղավաղվի, թող բարի լինեն մեր ամուսիններին ազատ արձակել»,– նշեց նա:

Վերջինս նաև տեղեկացրեց, որ օրերս ՄԻՊ գրասենյակից իրեն մի թուղթ են ներկայացրել, ըստ որի՝ ողնաշարի խնդիր ունեցող իր ամուսնուն նյարդերը հանգստացնող դեղեր են նշանակել, ինչը կալանավորի կինը աբսուրդ է որակում:

Մեր այն հարցին, թե նստացույցի արդյունքում ինչ–որ բան փոխվեց՝ Լալա Բեռնեցյանը պատասխանեց. «Նստացույցի արդյունքում ոչինչ էլ չփոխվեց, իրանք մտածում են, որ ճիշտ են, ու տղաները էդ արարքը գործել են»:

Շարունակությունը` «Փաստ» օրաթերթի այսօրվա համարում: