Ծեծկռտուք՝ ՔՊ Գյումրիի գրասենյակում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Oragir.News-ի տեղեկություններով` երեկ «ՔՊ» Գյումրիի գրասենյակում ծեծկռտուք է եղել Կարեն Սարուխանյանի և այլ ՔՊ-ականների միջև։

Մեր աղբյուրի փոխանցմամբ` վիճաբանությունը կապված է Գյումրիի քաղաքապետի պաշտոնի հետ։

Արդեն հայտնել էինք Գյումրիի քաղաքապետ Վարդգես Սամսոնյանի հնարավոր հրաժարականի մասին, քանի դեռ Գյումրիի քաղաքապետը պաշտոնապես հրաժարական չի ներկայացրել խ, ՔՊ-ում խմորումներ են, ավելի ճիշտ սկսվել են գժտություններ։ Իշխանական վերնախավը չի կարողանում կիսել քաղաքապետի աթոռը։ Մի կողմից Նիկոլ Փաշինյանի կնոջ` Աննա Հակոբյանի մորաքրոջ թոռն է հավակնում այդ պաշտոնին, մյուս կողմից այն մարդիկ, ովքեր անվերապահորեն ծառայում են Նիկոլ Փաշինյանին։

Նշենք, որ ՔՊ-ն Գյումրիի քաղաքապետի պաշտոնի համար մի քանի թեկնածուներ ունի։ Շրջանառվում են ԱԺ պատգամավոր Կարեն Սարուխանյանի, Աննա Հակոբյանի մորաքրոջ թոռան՝ Վահագն Մկրտչյանի (ով մինչեւ 2023 թվականի դեկտեմբերը զբաղեցնում էր Գյումրիի քաղաքապետի առաջին տեղակալի պաշտոնը), ինչպես նաև Արթուր Պապիկյանի անունը, ով ՊՆ նախարար Սուրեն Պապիկյանի ազգականն է։

Գյումրիի քաղաքապետ նշանակելու հարցում ՔՊ-ում տարակարծություններ են սկսվել, ինչը երեկ ավարտվել է վիճաբանությամբ։

Աննա Հակոբյանի ազգականն ասել է, եթե ոչ ինքը, ապա ավելի լավ է արտահերթ ՏԻՄ ընտրություններ լինեն։

Փաստն այն է, որ Գյումրիում 2021 թվականի ՏԻՄ ընտրություններին պարտված «Քաղաքացիական պայմանագիր» կուսակցությունը մեծ ռիսկի կդիմի, եթե գնա արտահերթ ընտրությունների։

Oragir.News-ը երեկվա վիճաբանության հետ կապված փորձեց մեկնաբանություն ստանալ Գյումրիի ավագանու ՔՊ խմբակցության ղեկավար Քնարիկ Հարությունյանից, բայց վերջինս մեր հեռախոսազանգերին չպատասխանեց, մեր զանգերն անպատասխան մնացին նաև ՔՊ-ական պատգամավոր Կարեն Սարուխանյանի կողմից։

ՔՊ-ի գրասենյակի աշխատակիցն էլ նշեց, որ այս պահին գրասենյակում բացի իրենից այլ մարդիկ չկան, որ պատասխանեն մեր հարցերին։ Վստահեցրեց, որ երեկ իրենք շատ բնականոն աշխատել են։

Հետևեք մեզ՝ այստեղ