Ինչպես է աշխարհն արձագանքել Լիբանան-Իսրայել hրադադարին

Համաշխարհային առաջնորդները ողջունել են Իսրայելի և լիբանանյան «Հեզբոլլահ» զինված շարժման միջև հրադադարի համաձայնագիրը, որն ուժի մեջ է մտել չորեքշաբթի առավոտյան, գրում է Al Arabiya-ն:

ԱՄՆ-ն և Ֆրանսիան

Իսրայելի և Լիբանանի միջև հրադադարը կպաշտպանի Իսրայելին Իրանի կողմից աջակցվող «Հեզբոլլահ» շարժման սպառնալիքից և պայմաններ կստեղծի «տևական հանգստության» համար, հայտարարել են ԱՄՆ նախագահ Ջո Բայդենը և Ֆրանսիայի նախագահ Էմանուել Մակրոնը՝ հրադադարի ուժի մեջ մտնելուց առաջ։

«Այսօրվա հայտարարությունը կդադարեցնի մարտերը Լիբանանում և կպաշտպանի Իսրայելին «Հեզբոլլահ»-ի և Լիբանանում գործող այլ ահաբեկչական կազմակերպությունների վտանգից», - ասվում է նախագահների համատեղ հայտարարության մեջ:

Նշվել է, որ Միացյալ Նահանգները և Ֆրանսիան կաշխատեն «ապահովելու համար, որ այս պայմանավորվածությունն ամբողջությամբ իրականացվի» և առաջնորդեն միջազգային ջանքերը լիբանանյան բանակի «կարողությունների ստեղծման» համար:

Բայդենը գործարքը որակել է «լավ նորություն» և նաև նշել, որ Միացյալ Նահանգները նոր ջանքեր կձեռնարկի Իսրայելի և Գազայում պաղեստինյան ՀԱՄԱՍ զինյալ խմբավորման միջև զինադադար ապահովելու համար: Մակրոնն էլ ասել է, որ Լիբանանի զինադադարը պետք է «ճանապարհ բացի՝ Գազայում պատերազմի ավարտի համար»։

Իսրայելի վարչապետ Բենիամին Նեթանյահուն շնորհակալություն է հայտնել ԱՄՆ նախագահ Բայդենին «հրադադարի համաձայնագրի ապահովման գործում ներգրավվածության համար»։ Իսրայելի կողմից գործարքի հաստատումից առաջ Նեթանյահուն ասել է, որ եթե «Հեզբոլլահ»-ը խախտի հրադադարի պայմանները, ապա Իսրայելը հարված կհասցնի։

Լիբանան

Լիբանանի վարչապետ Նաջիբ Միքաթին ասել է, որ հրադադարը «հիմնարար քայլ» է տարածաշրջանում կայունության վերականգնման ուղղությամբ:

Շնորհակալություն հայտնելով Ֆրանսիային և Միացյալ Նահանգներին իրենց ներգրավվածության համար՝ Միքաթին նաև վերահաստատել է իր կառավարության հանձնառությունը՝ «ուժեղացնել բանակի ներկայությունը հարավում»:

Իրան

Իրանի Իսլամական Հանրապետությունը ողջունել է հրադադարը Լիբանանում, ինչի մասին հայտարարել է երկրի արտաքին գործերի նախարարության խոսնակ Էսմայիլ Բաղային:

Գերմանիա

Գերմանիայի արտաքին գործերի նախարար Անալենա Բերբոքը ողջունել է գործարքը՝ այն որակելով որպես «հույսի շող ամբողջ տարածաշրջանի համար»:

«Սահմանի երկու կողմում գտնվող մարդիկ ցանկանում են ապրել իրական և կայուն անվտանգության պայմաններում», - ասվում է Բերբոքի հայտարարության մեջ: Նա գործարքն անվանել է «հաջողություն դիվանագիտության համար»:

Միացյալ Թագավորություն

Մեծ Բրիտանիայի վարչապետ Քիր Սթարմերը բարձր է գնահատել «վաղուց ուշացած» հրադադարը, որը «որոշ չափով թեթևացում կապահովի խաղաղ բնակչության,  Իսրայելի և Լիբանանի համար:

Եվրամիություն

ԵՄ ղեկավար Ուրսուլա ֆոն դեր Լեյենը ողջունել է հրադադարի «շատ հուսադրող լուրը»՝ ասելով, որ դա կբարձրացնի Լիբանանի «ներքին անվտանգությունն ու կայունությունը»:

«Հայտարարությունը ողջունելի նորություն էր առաջին հերթին մարտերից տուժած լիբանանցիների և իսրայելցիների համար: Լիբանանը հնարավորություն կունենա բարձրացնելու ներքին անվտանգությունն ու կայունությունը՝ «Հեզբոլլահ»-ի ազդեցության կրճատման շնորհիվ», - գրել է ֆոն դեր Լեյենը X-ում:

ՄԱԿ

Լիբանանի հարցերով ՄԱԿ-ի հատուկ համակարգող Ժանին Հենիս Պլասշերտը ողջունել է հրադադարի մասին համաձայնագիրը, սակայն զգուշացրել է, որ «զգալի աշխատանք է սպասվում» գործարքը կյանքի կոչելու համար:

«Պահանջվում է ոչ պակաս, քան երկու կողմերի լիակատար և անսասան հանձնառությունը», - ասվում է Հենիս Պլասշերտի հայտարարության մեջ:

Թուրքիա

Թուրքիայի արտաքին գործերի նախարարությունը հայտարարել է, որ ողջունում է հրադադարի մասին համաձայնագիրը՝ հույս հայտնելով, որ զինադադարը տևական կլինի։

«Միջազգային հանրության համար հրամայական է ճնշում գործադրել Իսրայելի վրա՝ լիովին պահպանելու հրադադարը և փոխհատուցելու այն վնասները, որոնք նա պատճառել է Լիբանանում», - ասվում է ԱԳ նախարարության հայտարարության մեջ:

Դրանում ասվում է, որ հրադադարը պետք է նաև Գազայում հնարավորինս շուտ հայտարարվի՝ տարածաշրջանում կայուն խաղաղության և կայունության համար:

Չինաստան

Չորեքշաբթի Չինաստանը հայտարարել է, որ ողջունում է հրադադարի համաձայնագիրը:

«Մենք աջակցում ենք լարվածությունը թուլացնելուն և խաղաղության հասնելուն նպաստող բոլոր ջանքերին և ողջունում ենք հրադադարի վերաբերյալ համապատասխան կողմերի համաձայնությունը», - հերթական ճեպազրույցի ժամանակ ասել է արտաքին գործերի նախարարության խոսնակ Մաո Նինգը՝ ընդգծելով նաև Գազայում հրադադարի հասնելու կարևորությունը։

Եգիպտոս

Եգիպտոսի արտգործնախարարը նույնպես ասել է, որ ողջունում է «Հեզբոլլահ»-ի և Իսրայելի միջև հրադադարի համաձայնագիրը:

Գիշերը հայտնի է դարձել, որ Իսրայելը հրադադարի պայմանագիր է կնքել Լիբանանի հետ։ Այս տեղեկությունից հետո Լիբանանի հարավի բնակիչները սկսել են վերադառնալ իրենց տները:

ԱՄՆ նախագահ Ջո Բայդենը հաստատել է, որ հրադադարի մասին համաձայնություն է ձեռք բերվել Իսրայելի և լիբանանյան «Հեզբոլլահ» շարժման միջև՝ 13 ամիս շարունակվող մարտերը դադարեցնելու համար։ Սա եղել է Լիբանանի վերջին տասնամյակների ամենամահաբեր հակամարտությունը, որի հետևանքով զոհվել է ավելի քան 3,823 մարդ:

«Վաղը տեղական ժամանակով ժամը 04:00-ից (Երևանի ժամանակով 06:00-ին) կավարտվեն մարտերը լիբանանա-իսրայելական սահմանի երկայնքով»,- ասել է Բայդենը՝ հավելելով, որ դա նպատակ ունի լինել «ռազմական գործողությունների մշտական դադարեցում»:

Նրա խոսքով՝ Իսրայելը պարտավոր է 60 օրում դուրս բերել իր զորքերը Լիբանանից, իսկ «Հեզբոլլահ»-ին այլևս երբեք թույլ չի տրվի սպառնալ Իսրայելի անվտանգությանը: Բայդենը հավելել է, որ հաջորդ 60 օրում Լիբանանի զինված ուժերը կտեղակայվեն իրենց տարածքներում, իսկ «Հեզբոլլահ»-ին թույլ չի տրվի վերականգնել իր ենթակառուցվածքները:

ԱՄՆ նախագահն ընդգծել է, որ Իսրայելի և լիբանանյան «Հեզբոլլահ» շարժման միջև խաղաղության համաձայնագիրը ձեռք է բերվել ԱՄՆ-ի նախաձեռնությամբ։