Քոչարյանի օրոք հալածվածն ու Մարուքյանի պաշտպանյալը Վանաձորում Օսկանյանի թեկնածուն է

Armtimes-ը գրում է․

Օգոստոսի 23-ին «Համախմբում» կուսակցության վարչությունը ՏԻՄ ընտրությունների վերաբերյալ հայտարարությամբ հանդես եկավ` նշելով, որ Վանաձորի ավագանու ընտրություններում կուսակցության ցուցակը կգլխավորի Վահան Ղույումչյանը: Վերջինիս կենսագրությունն ուսումնասիրելուց պարզ դարձավ, որ Ռոբերտ Քոչարյանի իշխանության տարիներին նրա նկատմամբ քրեական հետապնդում է իրականացվել:

Քոչարյանից հալածվածն Օսկանյանի կուսակցությունում

Այսպես, 2008 թվականին Ղույումչյանների ընտանիքը ցանկացել եւ փորձել է բիզնես ծրագրեր իրականացնել Վանաձոր քաղաքում: Հիմնադրել են տպագրական ծառայություններ մատուցող ընկերություն եւ օղու արտադրամաս, սակայն իշխանությունները, Ղույումչյանի խոսքով, ուժային կառույցների հետ միասին փորձել են ինչ-որ բան ստանալ նրանցից: 2003 թվականին նույնիսկ քրգործ է հարուցվել Վահան Ղույումչյանի հոր՝ Գարեգին Ղույումչյանի, դեմ: Գործարանն ու տպարանը պատրաստ են եղել աշխատելու, երբ քրգործ է հարուցվել: Ղույումչյանները հակընդդեմ հայց են ներկայացրել, սակայն չեն կարողացել հասնել Վճռաբեկ դատարան: Այնուհետեւ դիմել են Մարդու իրավունքների եվրոպական դատարան եւ հաղթել: 2016 թվականին ՀՀ կառավարությունը փոխհատուցել է Ղույումչյանների կրած վնասը:

Էդմոն Մարուքյանի պաշտպանյալն Էդմոն Մարուքյանի եղբոր դեմ

ՄԻԵԴ-ում եւս մեկ ուշագրավ դրվագ կա: Եվրոպական դատարանում Ղույումչյանների փաստաբանն է եղել ԱԺ պատգամավոր Էդմոն Մարուքյանը, ում եղբոր դեմ նաեւ պայքարելու է Վահան Ղույումչյանը Վանաձորի ընտրություններում, քանի որ «Լուսավոր Հայաստան» կուսակցության ավագանու ցուցակի առաջին համարը Քրիստ Մարուքյանն է:

Ղույումչյանը ցանկացել է արտագաղթել Կանադա

«Համախմբում» կուսակցության անդամի կենսագրականի ուշագրավ դրվագները վերը նշվածով չեն ավարտվում: Պարզվում է, որ դեռեւս 2008 թվականին նա «Իննա Կոգան» միջազգային իմիգրացիոն իրավաբանական ընկերության հայաստանյան գրասենյակի ղեկավար հանդես եկող Սերգեյ Ամատունու հետ կնքել է համաձայնագիր` Կանադա օրինական ներգաղթի համար անհրաժեշտ խորհրդատվական, փաստաթղթերի ձեւակերպման եւ օրինական ներգաղթի գործի պատրաստման ու Կանադայի դեսպանություն ներկայացնելու ծառայությունների մատուցման նպատակով։ Վահան Ղույումչյանի կողմից Սերգեյ Ամատունու ղեկավարած գրասենյակին վճարվել է 3 միլիոն 72 հազար դրամ, որից 2.592 միլիոնը վճարվել է դոլարով, դրանից 3.200 ԱՄՆ դոլարը փոխանցվել է, իսկ 4 հազար ԱՄՆ դոլար տրվել է առձեռն։ Սերգեյ Ամատունին ստանալով իր կողմից պահանջված փաստաթղթերը և վճարումները` մինչև 2010 թվականի հունիս ամիսը տարբեր պատճառաբանություններով Վահան Ղույումչյանի գործը չի ուղարկել Կանադայի դեսպանություն: Այս գործընթացն իրականցվել է Սերգեյ Ամատունու եւ նրա կնոջ՝ Հասմիկ Ադիլխանյանի կողմից:

Այս ամենից հետո Վահան Ղույումչյանը դիմել է դատարան, որն էլ որոշել է, որ «Համաձայնագրի» անվավերության հետևանքով Հասմիկ Ադիլխանյանից հօգուտ Վահան Ղույումչյանի բռնագանձել 4000 ԱՄՆ դոլարին համարժեք ՀՀ դրամ։

Իր կենսագրականի դրամատիկ զարգացումների վերաբերյալ զրուցեցինք հենց Վահան Ղույումչյանի հետ:

- Պարոն Ղույումչյան, ինչպե՞ս ստացվեց, որ Ռոբերտ Քոչարյանի իշխանության օրոք հալածվելուց հետո անդամակցեցիք Վարդան Օսկանյանի կուսակցությանը:

- Միգուցե նրանք անձնական կապ ունեն, բայց ի՞նչ կապ ունի կուսակցության վարած քաղաքականությունը Ռոբերտ Քոչարյանի հետ: Նա քաղաքականության մեջ, դուք ինձանից լավ գիտեք, որ չկա այս պահին:

- Փաստորեն դուք, որեւէ խնդիր չե՞ք տեսնում, որ Քոչարյանի իշխանության կարկառուն դեմքերից մեկի կուսակցությունում եք եւ Վանաձորի ավագանու ընտրություններում այդ կուսակցության առաջին համարն եք:

- Մեր կուսակցությունը կոլեգիալ մարմին է, հենց այս պահին պատրաստվում են մամուլի ասուլիսի: Մենք մամուլի ասուլիսով կներկայացնենք Վանաձորի մեր արդեն ավագանու թեկնածուներին եւ կուսակցության որոշումը:

- ՄԻԵԴ-ում ձեր շահերը ներկայացնում էր այն ժամանակ փաստաբան Էդմոն Մարուքյանը եւ հիմա պայքարելու եք նաեւ Մարուքյանի եղբոր՝ Քրիստ Մարուքյանի դեմ: Կաշկանդվածություն չունե՞ք կամ բարոյական պարտքի զգացում:

- ՄԻԵԴ-ի ամբողջ գործընթացը եւ ամբողջ փաթեթը ես ինքս եմ գրել: Երբ, որ ընդունելի է դարձել ՄԻԵԴ-ում գործը, նոր Էդմոն Մարուքյանը որպես փաստաբան մասնակցել է պրոցեսին: Իհարկե, մենք ունենք ընկերական հարաբերություններ, բայց դա քաղաքականության հետ ոչ մի կապ չունի: Մենք ազնիվ եւ արդար ձեւով մրցակցելու ենք:

- Իսկ ճի՞շտ է, որ ժամանակին ցանկացել եք ընտանիքով արտագաղթել Կանադա:

- Այո, ժամանակին այդպիսի մտահղացում ունեցել եմ:

- Իսկ ինչը փոխեց այդ մտադրությունը: Ի՞նչը բերեց այն մտայնության, որ արտագաղթելը ճիշտ չի...:

- Դա մեր ընտանիքի ներքին խնդիր է եղել: Հիմա հարմար չի, որ ես այդ մասին խոսեմ: Եթե ավելի մանրամասն կուզեք, հետո կխոսենք:

Նշենք, որ Վանաձորում ՏԻՄ ընտրությունները նշանակված են հոկտեմբերի 2-ին, որին մասնակցելու մասին արդեն իսկ հայտարարել են ՀՀԿ-ն, «Ալյանս»-ը, «Քաղաքացիական պայմանագիրը», «Լուսավոր Հայաստանը» եւ «Համախմբումը»: