Էջմիածնում թեժ մարտեր են

Armtimes-ը գրում է․

Էջմիածնում սեպտեմբերի 18-ին սպասվող քաղաքապետի ընտրությունները սպառնում են վերածվել թեժ մարտերի: Իրար դեմ են դուրս եկել գործող քաղաքապետ, գեներալ Մանվել Գրիգորյանի որդին՝ Կարեն Գրիգորյանն ու Էջմիածնի ավագանու նախկին անդամ, ինքնաառաջադրված Արթուր Թումանյանը՝ Սմերտ մականունով:

Կարեն Գրիգորյանն իր հոր հնարավորություններից բացի վայելում է նաև Հանրապետական կուսակցության աջակցությունը: Իսկ Արթուր Թումանյանին, Էջմիածնում շրջանառվող տեղեկությունների համաձայն, աջակցում են նախկին պատգամավոր Հակոբ Հակոբյանը՝ Ճոյտը, նախկին քաղաքապետ Հրաչիկ Աբգարյանը և քաղաքում ու Արմավիրի մարզում Գրիգորյանների մյուս հակառակորդները: Արթուր Թումանյանին է աջակցում անգամ Մանվել Գրիգորյանի եղբոր որդին՝ Արշալույս գյուղի գյուղապետ Զարզանդ Գրիգորյանը: Հայտնի է, որ այս երկու Գրիգորյանները թշնամական հարաբերություններ ունեն միմյանց հետ:

Այս երկուսի մրցապայքարն առայժմ ընթանում է միմյանց նկատմամբ մեղադրանքներ, անգամ հայհոյանքներ հնչեցնելու մակարդակով: Հակոբ Հակոբյանն, օրինակ, մեզ հետ հեռախոսազրույցի ժամանակ բացասական գնահատեց Կարեն Գրիգորյանի աշխատանքը 2008 թվականից սկսած: «Կատարված աշխատանքների ուսումնասիրությունը ցույց է տվել, որ բացի կենտրոնական փողոցներից, որևէ այլ փողոց չի վերանորոգվել, լուսավորություն գրեթե չկա: Էջմիածինցին մարդկային արժանապատվությունը կամաց-կամաց կորցնում է, քանի որ վախի մթնոլորտ կա: Քաղաքապետարանի մուտքն ամբողջությամբ փակված է, մարդիկ որևէ մեկի մոտ մտնելու համար պետք է ժամերով սպասեն, խնդրեն, որ նոր կարողանան մտնել ու իրենց խնդիրները բարձրացնել: Ես կարծում եմ, որ համայնքապետը գնում է այնտեղ ոչ թե աղայություն անելու, այլ ծառայելու ժողովրդին: Բայց այստեղ ժողովուրդը գնում է աղայի մոտ: Կա փոքր աղա, մեծ աղա, հետո դրանից ավելի մեծ աղա: Այդպես մենք Էջմիածինը վերածել ենք մի քանի մարդկանց բոստանի»,- ասաց Հակոբ Հակոբյանը:

Վերջինս պնդում է՝ Էջմիածնի նախկին քաղաքապետերի ժամանակ նման մթնոլորտ չի եղել, Գրիգորյաններն էլ քաղաքում նման ազդեցություն չեն ունեցել: Եվ որ նրանց ազդեցությունը մեծացավ այն ժամանակ, երբ Կարեն Գրիգորյանը դարձավ քաղաքապետ, իսկ Մանվել Գրիգորյանը՝ պատգամավոր: «Քոչարյանը երբ Մանվել Գրիգորյանին տնային կալանքի տակ էր պահում, այդ ժամանակ նրա լիազորությունները շատ քիչ էին»,- հավելեց Հակոբ Հակոբյանը:

Իսկ հիմա, Հակոբյանի խոսքերով, Գրիգորյանները քաղաքի հնարավորությունները ծառայեցնում են իրենց շահերին, նրանց ընտանիքի անդամներից բացի, որևէ մեկը քաղաքապետարանի հայտարարած մրցույթը չի շահում: «Ասֆալտը անում է մայրը, հացը տալիս է փեսան և այդպես շարունակ: Տարբեր աշխատանքներ կան, որոնց դեպքում քաղաքապետարանը պարտավոր է մրցույթներ հայտարարել ու բոլորին հավասար պայմաններ տալ, բայց հասարակությունը զրկված է այդ հնարավորությունից»,- հավելում է Հակոբ Հակոբյանը:

Իսկ Հակոբյանը չի՞ վախենում, որ Գրիգորյաններն իրենց հատուկ մեթոդներով այս խոսքերի համար կպատժեն իրեն: «Թող իրենք վախենան, որ մենք ժողովրդով չփորձենք իրենց պատժել: Եթե ես դա փորձեմ, շատ խիստ կպատժեմ: Իրենց ապօրինի գործողությունների համար էլ պատասխան կտան: Ես ամեն ինչ անելու եմ, որ այդ մարդիկ պատասխան տան օրենքի առաջ: Կարծում եմ, խախտվել է Սահմանադրությունը, հավասար մրցակցության պայմաններ չեն ստեղծվել»,- պատասխանես Հակոբ Հակոբյանը:

Էջմիածնի քաղաքապետարանի լրատվական ծառայության ղեկավար Վարդան Վարդանյանն էլ հադարձեց, թե Հակոբ Հակոբյանը «սուտ է խոսում և իրականությանը չհամապատասխանող բաներ ասում»: Եվ եթե նա անարդար մրցույթների կամ այլ ապօրինությունների վերաբերյալ փաստեր ունի, թող հրապարակի: Այդ դեպքում ի՞նչ խնդիր կա Հակոբյանի ու Գրիգորյանների միջև, որ նման հայտարարություններ են արվում: «Ենթադրում եմ, որ նախկին քաղաքապետերի օրոք իրեն լավ է զգացել, հիմա չի կարող: Երբ քաղաքապետ էր իր վերահսկողության տակ եղած մարդը, օրինակ Հրաչիկ Աբգարյանը, քաղաքի մանկապարտեզները վաճառում էր Հակոբ Հակոբյանին: 16 մանկապարտեզից ութը այդպես վաճառել են իրենց շրջապատի մարդկանց, իսկ Կարեն Գրիգորյանի օրոք նման բան չի եղել: Հակառակը, բոլոր մանկապարտեզները հիմնանորոգվել են, կահավորվել և որակյալ սնունդ են ստանում: Հիմնանորոգվել է մշակույթի տունը»,- ասում է Վարդան Վարդանյանը:

Վերջինիս կարծիքով Հակոբ Հակոբյանը հիմա պայքարում է Կարեն Գրիգորյանի դեմ նաև այն պատճառով, որ 2008թ. Էջմիածնում նրա հետ միասին քաղաքապետի թեկնածու էր առաջադրվել, բայց պարտվել էր: Վարդանյանը նաև պատասխանում է Հակոբ Հակոբյանի՝ Կարեն Գրիգորյանին բանավեճի հրավիրելու հայտարարությանը: «Կարեն Գրիգորյանը պատրաստ է բանավիճել իրենց ողջ թիմի՝ Հակոբ Հակոբյանի, Արթուր Թումանյանի, Հրաչիկ Աբգարյանի, Զարզանդ Գրիգորյանի հետ որտեղ իրենք կցանկանան՝ ժողովրդի առջև, թե որևէ հեռուստաընկերության եթերում»,- եզրափակեց նա:

Նշենք նաև, որ Էջմիածնի քաղաքապետի ընտրություններում պայքարը միայն այս մակարդակով չի ընթանում: Այս դեպքում շահերը բախվում են նաև իշխանական վերին օղակներում: Հայտնի է, որ Գրիգորյանները վայելում են Սերժ Սարգսյանի աջակցությունը: Իսկ ընտրություններում, ասում են, հակառակորդ թիմին ու Արթուր Թումանյանին ստվերային կերպով հովանավորում է վարչապետ Հովիկ Աբրահամյանը, ինչպես նաև՝ ԱԺ նախագահ Գալուստ Սահակյանը: Քաղաքական շրջանակներում հաճախ են խոսում, որ Հովիկ Աբրահամյանի ու Մանվել Գրիգորյանի հարաբերությունները տարիներ շարունակ լարված են: Որոշ տեղեկությունների համաձայն, Կարեն Գրիգորյանի հետ հակասություններ ունի նաև Արմավիրի մարզպետ Աշոտ Ղահրամանյանը: Մարզում բախվում են մարզպետի և Գրիգորյանների ազդեցությունները: