Զելենսկու ձախողումը թանկ կարժենա Ուկրաինային

Վերլուծաբանները դեռ երկար են գլուխ կոտրելու երեկ Սպիտակ տանը տեղի ունեցածի կապակցությամբ, քննարկելու են, թե ով և ինչպես սկսեց ու վարեց զրույցը, որը, վերջնարդյունքում հանգեց Ուկրաինայի նախագահ Վլադիմիր Զելենսկուն նախագահական նստավայրից վտարելուն։

Մեկ բան հստակ է, Թրամփ-Զելենսկի բանավեճն ավարտվեց Ուկրաինայի նախագահի կատարյալ ձախողմամբ, Ռուսաստանի դեմ պատերազմում Ուկրաինայի դիրքերի տոտալ զիջումով։ Մինչդեռ, Զելենսկին Վաշինգտոն էր մեկնել՝ «հազվագյուտ մետաղների» հարցով համաձայնագիրը ստորագրելու, որը, ինչպես ավելի վաղ էին նշում բոլոր կողմերը պատրաստ էր։ Նույնիսկ գրիչներն ու թղթերն էին դրված ԱՄՆ նախագահի սեղանին։ Բայց այսպես է լինում, երբ երկիրը կառավարում է սովորական մի ծաղրածու, ում թվում էր, թե կարող է պայմաններ թելադրել աշխարհի թիվ մեկ գերտերությանը։

2022 թ.-ից հետո Արևմուտքն այնքան երես էր տվել Ուկրաինայի նախագահին, ով իր ցանկալին ստանում էր ոչ միայն խնդրելով, այլև պահանջելով։ Զելենսկին չկարողացավ հասկանալ, որ Սպիտակ տանն այժմ բոլորովին այլ մարդիկ են՝ այլ արժեհամակարգով, այլ մտածմունքներով, և վերջիններիս համար կարևորն ԱՄՆ սեփական շահն է։

Ի դեպ, Սպիտակ տանից վռնդվելուց անմիջապես հետո Ուկրաինայի նախագահը հյուրընկալվել էր Fox News հեռուստաալիքին, չքմեղացել, շնորհակալությունների տարափ տեղացել։ Մինչդեռ, նույնը կարող էր անել Սպիտակ տանը, ավելի լավ պայմաններ ստանալով ԱՄՆ գործող վարչակազմից։ Իսկ Դոնալդ Թրամփն արդեն չեղարկել է համաձայնագիրը՝ Ուկրաինային մեն-մենակ թողնելով Ռուսաստանի դեմ։

Էմմա Աբովյան