Բանկը գրավողը մանկական երկաթուղու վերականգնողներից էր

«Հրապարակ»-ին ուշագրավ մանրամասներ են հայտնի դարձել Մոսկվայում բանկի մասնաճյուղ գրաված հայ գործարարի մասին։ Մոսկվայում «Սիթիբանկի» մասնաճյուղը գրաված, ապա իրավապահներին հանձնված հայ գործարարը` Արամ Պետրոսյանը, պարզվում է, ժամանակին Հայաստանում բարձր պաշտոն է զբաղեցրել: Նա եղել է ներքին գործերի նախկին նախարար Վանո Սիրադեղյանի խորհրդականը, համակարգել է տնտեսական վարչության աշխատանքը: Գործարարին ճանաչող մեր աղբյուրը պատմեց, որ Արամ Պետրոսյանը Ռուսաստանում բիզնեսներ է ունեցել, 90-ականների սկզբին եկել է Երեւան մի քանի օրով, տարբեր շրջանակներում ասել, թե կարելի է Հայաստանում բիզնես-մթնոլորտը լավացնել։ Այդ խոսքերը հասել են այն ժամանակվա ներքին գործերի նախարար Վանո Սիրադեղյանին, եւ վերջինս հրավիրել է նրան զրուցելու: Արդյունքում առաջարկել է նշանակել խորհրդական: Եվ, ահա, Արամ Պետրոսյանն իր ընկերների հետ որոշել է առաջին հերթին Երեւանի մանկական երկաթուղին վերանորոգել: «Մեքենայով զբոսնելու ժամանակ անցանք լրիվ քանդված «Նաբերեժնիով», քննարկեցինք՝ որպես առաջին քայլ, մանկական երկաթուղին վերականգնելու հարցը: Վանոյին ասացինք, ոգեւորվեց, կարծեմ մի 8-10 մեքենա ասֆալտ ես բերեցի Սեւանից, Արամը կոորդինացնում էր ողջ պրոցեսը, Վանոն գտավ շոգեքարշը վերականգնողներին, քանդակագործները 100-ական դոլար ստացան, կարծեմ, եւ որսորդական զենքի թույլտվություն: Գեղեցիկ բացում եղավ»,-պատմում է մեր աղբյուրը` նշելով, որ դրանից հետո մի քանի նախաձեռնություն էլ է եղել։ Որոշ ժամանակ անց, սակայն, գործարարը Վանո Սիրադեղյանի հետ խնդիրներ է ունեցել, աշխատանքից հեռացվել է եւ դատվել, ասում են` տնտեսական չարաշահումների պատճառով: Հիշեցնենք, որ ֆինանսական ծանր վիճակի, բանկերի առաջ պայմանագրերով սահմանված վարկային պարտավորությունները չկատարելու պատճառով Արամ Պետրոսյանը Մոսկվայում դիմել էր հուսահատ քայլի` գրավելով բանկի մասնաճյուղը եւ պատանդ վերցնելով 4 հոգու: Առարկան, որը նա ռումբ էր ներկայացրել եւ որով սպառնացել էր պայթեցնել բանկը, կեղծ էր եղել: Գործարարը նաեւ տեսաուղերձ էր հրապարակել, որտեղ առաջ էր քաշել երկու պահանջ՝ սնանկացումը ճանաչել որպես հիվանդություն պետական մակարդակով եւ ապա՝ համապատասխան բուժհաստատություններ բացել՝ այդ սնանկացած ֆիզիկական եւ իրավաբանական անձանց բուժելու համար: Հիշեցնենք, որ Պետրոսյանն զբաղվել է բժշկական նշանակության ապրանքների արտադրությամբ եւ վերջերս սնանկ է ճանաչվել: ՌԴ քրեական օրենսգրքի համաձայն` Պետրոսյանի արարքը պատժվում է 6-15 տարի ազատազրկմամբՆյութի աղբյուրը `