Ու՞մ է սպառնում COVID-19-ով կրկնակի վարակումը
ՀասարակությունԲժիշկները գտնում են, որ յուրաքանչյուրը կարող է երկրորդ անգամ վարակվել COVID-19-ով: Դա կարող է կատարվել ինչպես հակամարմինների բարձր մակարդակի պայմաններում, այնպես էլ պատվաստվելուց հետո: Նյութը վերցրել ենք gazeta.ru կայքից:
Բժշկական գիտությունների թեկնածու, իմունոլոգ Նիկոլայ Կրյուչկովը նշել է, որ կորոնավիրուսով կրկնակի վարակվելը հնարավոր է նույնիսկ արյան մեջ հակամարմինների բարձր մակարդակի դեպքում: Հակամարմինների բարձր մակարդակը 100%-անոց պաշտպանություն չի երաշխավորում:
Կրյուչկովի հետ համաձայն է նաև ինֆեկցիոնիստ Լիլիա Բարանովան, ով հարցազրույցի ընթացքում ասել է.
-Ցանկացած անձ կարող է երկրորդ անգամ վարակվել կորոնավիրուսով: Պարզապես հակամարմինների բարձր մակարդակի դեպքում հիվանդության ընթացքն զգալիորեն թեթև կլինի, իսկ դրանց ցածր մակարդակի դեպքում վիճակը կարող է անգամ ավելի վատ լինել:
-Իմունիտետը ձեռք է բերվում մեկ շտամի նկատմամբ, իսկ փոփոխված վիրուսը սկսում է այլ կերպ ազդել, և ահա՝ մարդը կրկին վարակված է, - նշել է ինֆեկցիոնիստ Աննա Բալանդինան:
Կրյուչկովը վստահություն է հայտնել, որ նույնիսկ պատվաստումը չի կարող բացառել կրկնակի վարակվելու ռիսկը: Նա նշել է, որ պատվաստումն արդյունավետ է ընդամենը 3-6 ամիս, ինչից հետո օրգանիզմի պաշտպանությունը կարող է ընկնել առնվազն 60-70%-ով:
Կրկնակի վարակման ռիսկի խմբում գտնվում են իմունային համակարգի լուրջ խանգարումներ ունեցող անձինք: Նրանց թվում են իմունիտետը ճնշող դեղամիջոցներ օգտագործող, ինչպես նաև ուռուցքային և աուտոիմուն հիվանդություններ ունեցող հիվանդները:
Նյութը հրապարակման պատրաստեց Լիլիթ Ամիրաղյանը