Ի՞նչ կապ կարող է ունենալ ԱՄՆ ՄԶԳ-ն Լաչինի միջանցքի հետ
BlogՀակոբ Բադալյանը ֆեյսբուքյան իր էջում գրել է.
Հունվարի 6-ին Հայաստանի արտգործնախարարը մի հեռախոսազրույց էր ունեցել՝ ԱՄՆ ՄԶԳ ղեկավարի հետ, որի ընթացքում, ըստ հաղորդագրության, քննարկվել էր Լաչինի միջանցքի հարց:
Թվում է, թե ԱՄՆ ՄԶԳ-ն ուր, Լաչինի ու ընդհանրապես արցախյան հարցն ուր: Բայց, այստեղ երեւի կա մի ուշագրավ նրբերանգ, ավելի շուտ՝ ֆիգուր: Սամանթա Փաուեր:
Ի դեպ, ըստ նախկինում ԱՄՆ ուղղությամբ դիվանագիտական աշխատանք իրականացրած տարբեր գործիչների՝ Հայաստանի հանդեպ իրապես համակրանք ունեցող գործիչ: Դա իհարկե քաղաքականություն որոշող, այն էլ գերտերության քաղաքականություն որոշող կատեգորիա չէ, չմոլորվենք, բայց նաեւ քաղաքականության մեջ կարող է ունենալ իր օգտակարությունը, հատկապես, երբ բավականին բարդ իրավիճակներում թանկ է դառնում ամենափոքր հավելյալ ռեսուրսն անգամ:
Փաուերը ԱՄՆ ՄԶԳ ղեկավար նշանակվեց Բայդենի վարչակազմի պաշտոնամուտից հետո: Ֆիգուրի ուշագրավության մասին անդրադարձս, ընդ որում ամենեւին ոչ առաջին անդրադարձս՝ մեկնաբանության բաժնում:
Թեեւ նշել եմ նաեւ այդ անդրադարձիս մեջ, բայց այստեղ էլ կրկնեմ. Փաուերի հանգամանքի հանդեպ ուշադրությունը չընկալել ուշադրություն «կախարդի» կամ «մոգի» հանդեպ, որը լուծելու է մեր բոլոր հարցերը: Սա բոլոր հարցերը լուծելու մասին չէ, այլ՝ առկա իրողությունների, դրանցում եղած հնարավոր ամենատարբեր շերտերի, եւ բարդ իրավիճակը հանգուցալուծելու համար անհրաժեշտ ջանքերի, որոնք թերեւս պահանջում են աշխատանք հյուսվածք առ հյուսվածք տրամաբանությամբ:
Ի դեպ, Սամանթան մինչեւ ԱՄՆ ՄԶԳ ղեկավար նշանակվելը, երբ Թրամփի պաշտոնամուտով թողեց ՄԱԿ-ում ԱՄՆ ներկայացուցչի պաշտոնը, կարճ ժամանակ անց ներգրավվեց Ավրորա մարդասիրական մրցանակաբաշխության ընտրող հանձնախմբի կազմ: Գուցե ավելորդ է հիշեցնել, որ Ավրորայի հիմնադիրը Արցախի ներկայիս պետնախարար Ռուբեն Վարդանյանն է: