Հայկական երկաթուղիները ծաղրում է ուղեւորներին

Լրագիր / «Հարավկովկասյան երկաթուղի» ընկերությունը մանկական տոմս է վաճառել Վրաստան հանգստի մեկնած ընտանիքին, այնինչ այդ տոմսերն անվճար պետք է տրվեն: Այս գործով տուժածները շուտով դիմելու են դատարան, կպահանջեն երկու տոմսերի գումարի փոխհատուցումը, այս ընկերության գործունեության հետ կապված այլ հարցեր էլ կփորձեն բարձրացնել:
ԳԱԱ իրավագետ Տիգրան Սարգսյանը, ով դատարանում ներկայացնելու է այս ընտանիքի շահերը, Lragir.am-ի հետ զրույցում անդրադարձավ այս դեպքին, ինչպես նաև «Հարավկովկասյան երկաթուղու» կողմից մատուցվող ծառայությունների ցածր մակարդակին:
Վրաստանի Ուռեկի հանգստավայր հանգստի մեկնած ընտանիքը փորձել է երկու մեծահասակի ու երկու երեխայի տոմս ձեռք բերել: Ուռեկիում տոմս գնելիս ասել են, որ իրենց հետ երեք տարեկան երկու երեխա կա և մանկական տոմս են խնդրել: Տիգրան Սարգսյանի խոսքով՝ մանկական տոմսը մինչև հինգ տարեկան երեխաների համար անվճար է, դա հաստատում է նաև ընկերության տնօրինությունը: Եվ չնայած դրան, այս ընտանիքից գումար են գանձել՝ յուրաքանչյուր տոմսի համար մեծահասակի մեկ տոմսի կես գնի չափով:
Ընտանիքը Երևան վերադառնալով՝ դիմել է «Հարավկովկասյան երկաթուղի» ընկերության տնօրինությանը: Այնտեղից քաղաքացուն պատասխանել են. «Հարգելի ծնող, մինչև հինգ տարեկան երեխայի տոմսն անվճար է, սակայն եթե ծնողը ցանկանում է, ապա կարող է դրա համար վճարել»:
Այս պատասխանը, ըստ մասնագետի, աբսուրդ պատասխան է: Բողոքներից հետո ընկերությունից ոչ միայն տոմսերի գումարը չեն վերադարձրել, այլ նաև չեն էլ ընդունել իրենց սխալը:
«Եթե մանկական տոմսն անվճար է, ի՞նչ իրավունք ունեն նրանք դրա համար գումար գանձել: Դա աբսուրդ պատասխան է, երբ ասում են՝ եթե ծնողն ուզում է, կարող է այդ գումարը վճարել: Բնական է, որ ոչ մի խելամիտ ծնող չի ցանկանա վճարել մի բանի համար, ինչն անվճար է», ասաց նա:
Տիգրան Սարգսյանն ուշադրություն է հրավիրում «Հարավկովկասյան երկաթուղիներ» ընկերության կողմից ՀՀ քաղաքացիներին մատուցվող ծառայություններին: Ըստ նրա՝ փաստացի ՀՀ քաղաքացին այսօր վճարում է մի ծառայության դիմաց, որը նրան չի մատուցվում:
«Այսօր այդ ընկերության գնացքներով երթևեկողների 90 տոկոսը կփաստեն, որ այնտեղ ծառայությունների մատուցումը շատ ցածր մակարդակի վրա է: Հանգստավայրեր մեկնող գնացքներում օդափոխության, սանիտարահիգիենիկ, ուղեկցորդների վերապատրաստման կարիք կա, թե ինչպես պետք է շփվեն ուղևորների հետ, որոնց մի մասը զբոսաշրջիկներ են և առաջին անգամ են Հայաստան մուտք գործում», ասաց նա:

շարունակությունը՝ կայքում