Ռումասի կարծիքով՝ Հայաստանը ողորմելի հավաքական է

Նոյեմբերի 9-ին Վազգեն Սարգսյանի անվան «Հանրապետական» մարզադաշտում Հայաստանի ազգային հավաքականը ընկերական հանդիպում կանցկացնի Բելառուսի հետ: Կարող է տարօրինակ հնչել, բայց մեր առաջիկա մրցակիցը 2018 թվականի աշխարհի առաջնության ընտրական փուլում ավելի վատ արդյունք է ցույց տվել, քան Հայաստանի հավաքականը: А ենթախմբում 10 խաղում վաստակելով ընդամենը 5 միավոր՝ բելառուսները եզրափակել են մրցաշարային աղյուսակը:

«Վերջին չորս հանդիպումներում Բելառուսի հավաքականը նույնքան պարտություն է կրել: 2017 թվականի վերջին հանդիպումը մեր հավաքականն անցկացնելու է Երևանում: Բելառուսի ֆուտբոլի ֆեդերացիայի նախագահ Ռումասը կարծում է, որ Հայաստանը ողորմելի թիմ է, և մեր հավաքականը Երևանում հեշտությամբ կհաղթի: Նա հույս ունի տարին ավարտել դրական արդյունքով, ուստի երևանյան հանդիպումը Բելառուսի վերջին շանսն է: Նշեմ նաև, որ Բելառուսի պես ողորմելի թիմի հետ ոչ մի նորմալ հավաքական չի ցանկանում ընկերական հանդիպում անցկացել: Դժվար թե՝ բացի Հայաստանից, որևէ այլ հավաքական ցանկություն ունենար խաղալ Բելառուսի հետ: Եթե ոմանք տեղյակ չեն՝ նշեմ, որ Սերգեյ Ռումասի առաջին տեղակալը Սերգեյ Սաֆարյանն է: Չեմ կասկածում, որ Հայաստանի հավաքականի հետ հանդիպումը նախաձեռնողներից է եղել հենց Սերգեյ Վաղարշակովիչը»,- «Առաջին լրատվական»-ի հետ զրույցում ասաց սպորտային լրագրող Նիկոլայ Մազուրը, որը 2011 թվականին ստիպված է եղել արտագաղթել Բելառուսից՝ ապաստարան ստանալով Էստոնիայում:

Մասնավորապես, մեր զրուցակիցը հայտարարել էր, որ Բելառուսի նախագահ Ալեքսանդր Լուկաշենկոն թքած ունի ֆուտբոլի վրա և ուշադրություն է դարձնում միայն տափօղակով հոկեյին, մասնավորապես Մինսկի «Դինամոյին»: «Ինձ ընդամենը կես օր ժամանակ տվեցին Բելաուսը լքելու համար, հակառակ դեպքում սպառնում էին 10 տարով բանտ ուղարկել: Հիմա ընտանիքիս հետ բնակվում եմ Տալլինում, բայց քաջատեղյակ եմ բելառուսական ֆուտբոլի բոլոր զարգացումներին»,- ասաց Մազուրը:

2018 թվականի աշխարհի առաջնության ընտրական փուլում Բելառուսի հավաքականը միակ հաղթանակը տարել է հունիսի 9-ին՝ Մինսկում 2:1 հաշվով առավելության հասնելով Բուլղարիայի նկատմամբ: Օգոստոսի 31-ին բելառուսները հյուրընկալվելիս 1:0 հաշվով զիջել են Լյուքսեմբուրգին, իսկ 3 օր անց սեփական հարկի տակ 4:0 հաշվով՝ Շվեդիայի ընտրանուն: Հոկտեմբերի 7-ին սեփական հարկի տակ Բելառուսի հավաքականը 1:3 հաշվով պարտվել է Շվեդիային, իսկ ընտրական փուլի վերջին խաղում մրցակցի հարկի տակ 2:1 հաշվով զիջել է Ֆրանսիային:

«Բելառուսական ֆուտբոլում բռնատիրական կարգեր են տիրում: Ոչ մի նորմալ մարզիչ չի ցանկանում աշխատել Ռումասի հետ: Մենք ունենք Գոնչարենկոյի, Կուչուկի պես մասնագետներ, բայց հավաքականը անմխիթար վիճակում է գտնվում: Վերջերս Ռումասը ազգային հավաքականի ղեկը վստահեց Իգոր Կրիուշենկոյին: Այս մասնագետի գլխավորած միակ նորմալ թիմը Մինսկի «Դինամոն» է եղել: 2007 թվականին մեկ տարի աշխատելով այս թիմում՝ Կրիուշենկոն ձախողվեց և պաշտոնանկ արվեց: Կարծում եմ՝ մեկնաբանություններն ավելորդ են:

Երբ հայտնի դարձավ, որ Բելառուսը մրցելու է Հայաստանի հետ, կրկին անգամ ուսումնասիրեցի հայկական ֆուտբոլը: Գիտեմ, որ ձեր ֆուտբոլում ևս բռնատիրական կարգեր են: Գիտեմ, որ Յուրա Մովսիսյանի պես ֆուտբոլիստի մուտքն ազգային հավաքական խստիվ արգելված է: Տեղյակ եմ, որ Հայաստանի առաջնությունը կործանման եզրին է, և չեմպիոնի կոչման համար պայքարում են ընդամենը 6 թիմեր: Եվ որ ամենակարևորն է՝ Հայաստանի հավաքականը գլխավորում է մարզիչ, որը իր որակներով չի գերազանցում Կրիուշենկոյին: Արթուր Պետրոսյանն էլ Կրիուշենկոյի պես մինչև Հայաստանի ազգային հավաքականը գլխավորելը՝ որպես գլխավոր մարզիչ չէր աշխատել որևէ լուրջ թիմում:

2015 թվականին էլ Հայաստանի և Բելառուսի հավաքականները ընկերական հանդիպում էին անցկացրել Երևանում: Այդ ժամանակ նույնիսկ բելառուսական թերթերը գրեցին հայկական ֆուտբոլում տիրող խայտառակ վիճակի մասին: Կարճ ասած՝ նոյեմբերի 9-ին Երևանում տեղի է ունենալու երկու դժբախտ հավաքականների հանդիպում, որոնք գտնվում են միևնույն խորտակվող նավակում»,- ասաց Մազուրը:

Նշենք, որ ընտրական փուլում ձախողված Հայաստանի ազգային հավաքականի համար ևս առաջիկա ընկերական հանդիպումները հնարավորություն են տարին դրական արդյունքով ավարտելու: Բելառուսի հետ հանդիպումից 5 օր անց Հայաստանի հավաքականը Երևանում կմրցի Կիպրոսի հետ: