«Կանչում ես, չի գալիս՝ բերման ենթարկիր․ ինչո՞ւ ես կալանավորում մարդուն». Գ. Կոստանյան

Եթե մարդու նկատմամբ կիրառված է խափանման միջոց՝ երկրից չհեռանալու մասին, և մարդը խախտում է այդ պայմանը, նրան կարող են կալանավորել: Այս մասին ԱԺ Պետաիրավական հարցերով մշտական հանձնաժողովի նիստում հայտարարեց հանձնաժողովի նախագահ Գևորգ Կոստանյանը:

Նշենք, որ արդարադատության նախարար Դավիթ Հարությունյանն առաջարկում է փոխել Քրեական դատավարության օրենսգրքի 135 հոդվածի 2-րդ մասի 2-րդ պարբերությունը:

Առաջարկվում է լրացում կատարել և ներառել դրույթ այն մասին, որ կալանավորումը մեղադրյալի նկատմամբ կարող է կիրառվել նաև այն դեպքում, եթե մեղադրյալի կողմից էականորեն կամ պարբերաբար խախտվել են նրա նկատմամբ կիրառված խափանման միջոցի պայմանները, և կան բավարար հիմքեր ենթադրելու, որ այդ խափանման միջոցի կիրառումը կամ խափանման այլ միջոց կիրառելն այլևս բավարար չեն նրա կողմից սույն հոդվածի առաջին մասով նախատեսված որևէ գործողության կատարումը կանխելու համար:

Գևորգ Կոստանյանը նշեց, որ քրեական օրենսգրքում կան հոդվածներ, որոնք ազատազրկման հետ կապ չունեցող պատիժներ են սահմանում, և ստացվում է, որ մարդը կատարում է մի հանցանք, որի համար ազատությունից զրկելու պատիժ լինել չի կարող, բայց քննիչի կանչով չներկայանալու դեպքում նրան կարող են կալանավորել:

«Ստացվում է, որ մարդը կարող է ազատությունից զրկվել այնպիսի մի արարքի համար, որը մեր օրենսդրությամբ հանցանք չի համարվում: Մարդը կարող է կատարել մի հանցանք, որի համար ինքը չի կարող ազատությունից զրկվել, բայց քննիչի կանչով երկու անգամ չներկայանալու դեպքում նրան կարող են ազատությունից զրկել: Սա անընդունելի է սկզբունքորեն»,- ասաց Կոստանյանը:

Հանձնաժողովի նախագահը նշեց, որ սա հակասում է եվրոպական նախադեպային իրավունքին:

«Ես միաժամանակ կիսում եմ իրավակիրառ մարմինների մտահոգությունը, որ եթե անձի նկատմամբ կիրառվել է խափանման միջոց՝ երկրից չբացակայելու մասին, ապա եթե անձը չի ներկայանում, դա պետք է հետևանքներ ունենա: Դրա համար բազմաթիվ լուծումներ կան: Կանչում ես, չի գալիս՝ բերման ենթարկիր, ինչո՞ւ ես կալանավորում մարդուն»,- մանրամասնեց Կոստանյանը:

Նրա խոսքով՝ ազատությունից զրկելը որոշակի ժամկետով պատիժ է: «Կա մտահոգություն, փաստում ենք, բայց դրա ձևը սա չէ: Ես դեմ եմ այս տարբերակին: Այս հոդվածի ընդունումը ինձ համար սկզբունքային է՝ Մարդու իրավունքների եվրոպական դատարանի կարգավորումների տեսանկյունից: Քանի որ պարոն Հարությունյանը մեզ փաստի առաջ է կանգնեցրել, ես առաջարկում եմ դեմ քվեարկել այս օրենքին, թող տանեն, փոխեն, հետո կորոշենք»,- նշեց Գևորգ Կոստանյանը:

Արդարադատության նախարար Դավիթ Հարությունյանը նկատեց, որ նույն հոդվածով ասվում է, թե կալանավորումը կարելի է կիրառել այնպիսի հանցագործությունների համար, որոնց համար նախատեսված պատժի առավելագույն ժամկետը 1 տարուց ավելի է, կամ մեղադրյալը կարող է կատարել սույն հոդվածի առաջին մասով նախատեսված գործողությունը:

«Նշանակո՞ւմ է արդյոք, որ մեր օրենսդրությունը նախատեսում էր, որ կալանավորումը կարող էր կիրառվել՝ անկախ նրանից պատիժը 1 տարուց ավելի էր, թե ոչ»,- հարցրեց նախարարը:

Գ. Կոստանյանը պատասխանեց, որ լրացումները բերվել են շտկելու խնդիրները: Հանձնաժողովի նախագահը ասաց, սակայն, որ «հոնքը ուղղելու փոխարեն երկու աչքն էլ եք հանում»: Ըստ նրա՝ եվրոպական նախադեպային կոնվենցիան մի կողմ թողնել չի կարելի, այն պետք է հաշվի առնել:

Ապա Գևորգ Կոստանյանն առաջարկեց կողմ քվեարկել՝ դրական եզրակացություն տալ, բայց լիագումար նիստում հարցը քննարկել: Հանձնաժողովը, սակայն, բացասական եզրակացություն տվեց հարցին:

Այս թեմայով «Ինձ համոզելը շատ դժվար է»․ Կոստանյանը չի քվեարկի Փաշինյանի օգտին Մարգարիտա Բարխոյանի հայրն ազատ արձակվեց Գագիկ Մուրդյանը կալանավորվեց․ տեսանյութ Պաշտոնյա է կալանավորվել Երևանում ոստիկան է կալանավորվել