Խորհուրդներ բժշկից՝ մեջքի ցավերի դեպքում

Մեջքի ցավերը ծանոթ են հատկապես նստակյաց աշխատանք ունեցողներին: Սա իսկական գերխնդիր է, որը շատերին է հուզում՝ անկախ տարիքից: Մ. Հերացու անվան թիվ 1 հիվանդանոցային համալիրի նյարդավիրաբույժ Սեւակ Բադալյանի խոսքով դարի հիվանդության դեմ պետք է ճիշտ պայքարել:

 «Կարելի է ասել, որ նստակյաց կյանքի հետեւանքով առաջացած մեջքի ցավը համարվում է 21-րդ դարի հիվանդություն, իսկ քանի որ մեր օրերում գրասենյակային աշխատանքները գնալով շատանում են, հետեւաբար նաեւ այս հիվանդությունը եւս ավելի մեծ տարածում է գտնում: Մարդիկ երբեմն ժամերով, անգամ մի ամբողջ օր ստիպված են լինում նստել համակարգչի առաջ եւ աշխատել, իսկ դա բերում է ողնաշարի մկանակապանային համակարգի, այսպես կոչված, անգործության, որն էլ հանգեցնում է հետագա խնդիրների, որոնք հիմնականում դրսեւորվում են մեջքի ցավով՝ գոտկային, կրծքային եւ պարանոցային հատվածներում: Այս խնդրի հետեւանքով կարող է նաեւ առաջանալ լարվածություն եւ գլխացավ:

Անգործությունից առաջանում է մկանային թուլություն, որը բերում է ողերի՝ միմյանց նկատմամբ ավելի արտահայտված ճնշման: Այսինքն՝ ողերի ճնշումը մեկը մյուսի վրա ավելանում է, իսկ մենք գիտենք, որ ողերի միջակայքում տեղակայված են միջողային աճառները: Մեխանիկական ճնշումից առաջանում է միջողային աճառի արտափկում, որն էլ հիմնականում արտափկվում է դեպի ողնաշարային խողովակ, որտեղով անցնում են ողնուղեղային նյարդերը եւ ընթացքն էլ համապատասխան վերջույթն է: Այս ամենի հետեւանքով առաջանում են ինչպես տեղային ցավեր՝ ողնաշարի երկայնքով, այնպես էլ ցավեր, որոնք ճառագայթում են միջողային մակարդակից դեպի վերջույթներ: Այս ցավերով պայմանավորված հիվանդությունները ժողովրդի շրջանում տարածված են ռադիկուլիտ, իշյազ անվանումներով»,- Life.panorama.am-ի հետ զրույցում նշեց բժիշկը:

Այս խնդրից խուսափելու հիմնական միջոցը, ըստ բժշկի, ֆիզիկական ծանրաբեռնվածությունն է: «Պետք է կանոնավոր ֆիզիկական աշխատանքով զբաղվել, հաճախել մարզասրահներ, շատ օգտակար է նաեւ լողը: Բացի սրանից, պետք է աշխատանքի ընթացքում հաճախ ընդմիջել, օրինակ՝ 1,5-2 ժամը մեկ վեր կենալ նստակյաց դիրքից եւ որոշակի վարժություններ անել, եթե դա թույլ է տալիս աշխատավայրը: Շատ օգտակար են նաեւ զբոսանքները՝ հանգիստ քայլը, որի տեւողությունը կախված է տվյալ մարդու առողջական վիճակից. Եթե, որեւէ խանգարող բան չկա, ապա օրական առնվազն 1կմ պետք է քայլել»,- ընդգծեց բժիշկը:

Մեր զրուցակցի խոսքով՝ այս խնդրի վատագույն հետեւանքը միջողային աճառի ճողվածքի առաջացումն է, որը հաճախ պահանջում է անգամ վիրահատական միջամտություն: Բժիշկ Սեւակ Բադալյանը այս խնդիրը կանխելու նպատակով ժողովրդական միջոցները չի մերժում, բայց նաեւ ընդգծում է՝ յուրաքանչյուր պարագայում միայն մասնագետի հետ խորհրդակցելուց հետո կատարել դրանք:

«Հայերս սովորություն ունենք մտածել, որ եթե մեր հարեւանը տվյալ բանն արել է եւ լավ արդյունք է ունեցել, ապա իրեն եւս կօգնի: Սակայն պետք է հիշել, որ յուրաքանչյուր օրգանիզմ ինդիվիդուալ է: Եթե բուսական կամ ժողովրդական այլ միջոցները արվում է մասնագետի հսկողությամբ, ապա ես դեմ չեմ: Ի վերջո, միշտ չէ, որ հիվանդին ցուցված է դեղորայքային բուժում, բայց կրկնում եմ՝ միշտ պետք է հաշվի առնել կողմնակի, երբեմն վտանգավոր ազդեցությունները»,- ավարտեց նա:

Այս թեմայով Ինչպես ունենալ բարակ գոտկատեղ ու նուրբ փորիկ՝ առանց դիետաների