23-ամյա աղջիկը թունավորել է նախկին ընկերոջ մորը՝ տղայից վրեժ լուծելու նպատակով (լուսանկարներ)

ԱՄՆ-ում 23-ամյա Քեյթլին Քոնլին թունավորել է իր նախին ընկերոջ մորը՝ նախկին սիրեցյալից վրեժ լուծելու նպատակով:

Ինչպես գրում է life.ru-ն, Քեյթլինի և իր նախկին ընկերոջ՝ Ադամ Յոդերի հարաբերությունները սկսվել են դեռ 2011 թվականին: Տղայի ընտանիքը շատ ջերմ է ընդունել աղջկան, իսկ Ադամի մայրը՝ Մերի Յոդերը, նույնիսկ ընդունել է նրան աշխատանքի իր իրավաբանական ընկերությունում:

Չնայած այդ ամենին՝ երիտասարդների հարաբերություններն այդքան էլ հեշտ չեն ընթացել, և Ադամը տարիներ անց ի վերջո որոշել է բաժանվել:

Ադամի հետ կապը խզելուց հետո Քեյթլինը նախկին սիրեցյալի մոր ընկերությունից հեռանալ չի շտապել և շարունակել է աշխատել այնտեղ:

2015 թվականի հուլիսին 63-ամյա Մերի Յոդերի ինքնազգացողությունը կտրուկ վատացել է, և նրան շտապ տեղափոխել են հիվանդանոց: Հիվանդանոցում կինը սրտի կաթված է տարել և մահացել երկու օր անց:



Քեյթլինն այդ օրերին իր վիշտն է արտահայտել սոցցանցերից մեկի իր էջում՝ նշելով, որ հանգուցյալ Մերին շատ բան է իրեն սովորեցրել, խոր ազդեցություն ունեցել իր ամբողջ կյանքի վրա և որ ինքը շատ հաջողակ մարդ է, որ իրենց կյանքի ուղիները խաչվել են:

Ամիսներ անց, սակայն, հաջողվել է պարզել, որ Մերին մահացել է դեղորայքի միջոցով թունավորման հետևանքով: Ոստիկաններն ի սկզբանե բացառել են ինքնասպանության վարկածն ու փորձել գտնել մարդասպանին: Վերջիններս նախ կասկածել են հանգուցյալի ամուսնուն, սակայն ավելի ուշ նրանց ձեռքն է ընկել անանուն նամակ, որում նշվում էր, որ Մերիին սպանել է իր որդին՝ Ադամը: Տղայի մեքենայի մեջ գտնվել է նաև այն դեղորայքը, որով թունավորվել էր նրա մայրը:

Ոստիկանությունը կասկածանքով է մոտեցել այս բացահայտմանը, քանի որ Ադամն, ըստ իրենց, որևէ հիմք չուներ մորը սպանելու համար, և բացի այդ՝ անհասկանալի էր նրա՝ դեղորայքը մեքենայի մեջ պահելու փաստը:

Ավելի ուշ ԴՆԹ թեստի միջոցով պարզ է դարձել, որ նամակը գրվել է նրա նախկին ընկերուհու կողմից:

Աղջիկը խոստովանել է, որ նամակը գրել է ինքը, սակայն հերքել է սպանությանն իր մասնակցության մասին մեղադրանքները:

Քննությունը ենթադրում է, որ աղջիկը կարող էր դիմել նման քայլի՝ Ադամի հետ կրկին մտերմանալու կամ նրանից վրեժ լուծելու նպատակով:

Ի վերջո, Քեյթլինը դատապարտվել է 23 տարվա ազատազրկման՝ այդպես էլ չընդունելով իր մեղքը: