«Այն փաստերը, որ ես հրապարակեմ, ուղղակի ավերածություններ կանեն». Դեմոյանն սպառնում է

Հայոց ցեղասպանության թանգարան–ինստիտուտի նախկին տնօրեն Հայկ Դեմոյանը չի մասնակցի  ինստիտուտի տնօրենի թափուր պաշտոնի մրցույթին։ Այս մասին այսօր՝ հուլիսի 3-ին, լրագրողների հետ զրույցում  հայտարարեց Հայկ Դեմոյանը։

Ի դեպ վերջինս թանգարան այցելեց  խորհրդի նիստից մեկ ժամ առաջ, որտեղ ընտրում էին  հոգաբարձուների խորհրդի նախագահ եւ քարտուղար։ Հայկ Դեմոյանը շեշտեց, որ մինչեւ նոր տնօրենի ընտրությունը, ինքը շարունակելու է մնալ  թանգարանի գիտխորհրդի նախագահի կարգավիճակում։  Դեմոյանն անդրադառնալով՝ ԿԳՆ նախարարի եւ փոխնախարարին ուղղված իր կոշտ քննադատությանն ու պիտակավորումներին, ասել է, որ դա իր էմոցիոնալ արձագանքն էր նրանց  պահվածքին։ 

«Երբ մեկ ամսվա ընթացքում քաղաքացի Հայկ Դեմոյանը դեռ Բոստոնից, գործուղման մեջ գտնվելու ընթացքում փորձում է կապվել նախարարի, փոխնախարարի հետ, որպեսզի այդ 5 րոպեանոց հանդիպումը կայանա, որպեսզի ես ճշտեմ իմ կարգավիճակը, չէ՞ որ ես գործուղումով եմ մեկնել, հրամանը կա։ Երկու իրավական լուրջ խնդիր կա այստեղ՝ մեկը մրցույթը չի կայացել, դա անօրինական է, որովհետեւ չի ծանուցվել, թե ինչու չի կայացել, իմ իրավունքները խախտվել են, երկրորդ, ակադեմիայի կողմից ես որպես գործուղման մեջ գտնվող անձ եմ եղել։

Հիմա գործուղման մեջ եմ եղել, կարգավիճակ է փոխվել, իմ կարգավիճակը ո՞րն է, եղբայրներ, մի հատ ասեք, էլի։ Իմ նամակը էմոցիոնալ էր, բայց իմ էմոցիոնալ պոռթկումը վերոնշյալի հիման վրա էր։ Դա միայն իմ էմոցիոնալ արձագանքն էր այն քամահրանքի, արհամարհական վերաբերմունքի, որին ես արժանացա։ Նախարարն իր բերանով ասաց, չէ՞՝ Դեմոյանն ո՞վ է, որ ես ժամանակ տրամադրեմ»,-ասաց նա։

Հայկ Դեմոյանը հայտարարեց, որ հանուն Ծիծեռնակաբերդի չի պատրաստվում դիմել դատարան, որովհետեւ մեծ խնդիրներ են առաջանալու․ «Ինձ համար թանգարանի կարգավիճակն ավելի կարեւոր է, քան իմ անձնական հարցերը։ Ես շատ լավ գիտեմ, որ իրավական առումով ես իրավունք ունեմ իմ իրավունքները վերականգնել, դա չեն հասկանում ԿԳՆ-ում»։

Հայկ Դեմոյանը եւս հաստատեց, որ անձնապես ծանոթ չէ նախարար Արայիկ Հարությունյանի, եւ փոխնախարար Հովհաննես Հովհաննիսյանի հետ: «Ես լուրջ ենթադրություններ ունեմ, այս պահին ձեռնպահ կմնամ հնչեցնելուց, եւ ես հետագա զարգացումների հիման վրա պետք է հրապարակեմ շատ լուրջ փաստեր եւ փաստաթղթեր, որից հետո հանրությունը կիրազեկվի իրական պատճառների մասին»,-ասաց նա ՝ նշելով, որ ենթադրաբար դրանք վերաբերում են իր անձի թանգարանից ամեն կերպ մեկուսացնելու ձգտումներին:

Ինչ վերաբերում է իր գրառման մեջ ակնարկած նախարարի եւ փոխնախարարի հովանավորյալին, ապա նա բացահայտեց որ այդ հովանավորյալը Սուրեն Մանուկյանն է, ում հետ նրանք ունեցել են ֆեյսբուքային գրառում եւ նշեց, որ վիդեոձայնագրություններ, տեսաձայնագրություններ ունի:

Նա նշեց, որ արդեն հինգ անձի միջոցով մինչ իր գրառումը փորձեր է կատարել խուսափել բախումներից եւ հակամարտությունների: Դեմոյանը համաձայնեց, որ կամուրջները այրված չեն, պատրաստ է հանդիպել: «Երկու տարբերակ ունենք կամ գնում ենք խորը հակամարտության եւ բացահայտումները լուջ ճգնաժամ է ստեղծելու, որովհետեւ այն փաստերը որ ես հրապարակեմ, ուղակի ավերածություններ կլինի այս տարածքում զուտ բարոյական դաշտում: Բայց դա իմ ցանկությունը չէ, ես չեմ ուզում խանգարել թանգարանի բնականոն գործընթացին, չեմ ուզում վարկաբեկել Ծիծեռնակաբերդը, բայց միաժամանակ չեմ կարող հանդուրժել երբ արհամարհում եւ մեկուսացնում են ինձ»,-ասաց նա:

Ինչ վերաբերում է  թափուր պաշտոնի մրցույթին մասնակցելուն, Դեմոյաննասաց. «Իմ միակ ցանկությունը վերադարձից հետո եղել է՝ օրինականության դաշտում թանգարան-ինստիտուտից հեռանալս ձեւակերպելը։ Ես հայտարարել եմ, որ չեմ շարունակում տնօրենի պաշտոնին հավակնել, որովհետեւ այլ մարդիկ պետք է շարունակեն։ Հիմա ԿԳՆ-ի այս վախը չեմ հասկանում»։

ԿԳ նախարարի տեղակալի հետ ցանկացել է հանդիպել, որպեսզի հստակեցնեն, թե ինչպե՞ս են ապահովելու օրինական ճանապարհով իր հեռանալը, որովհետեւ, Դեմոյանի խոսքով՝ այդտեղ իրավական լուրջ խնդիրներ կան։

«Ես կամավոր որոշեցի պետք է հեռանալ, որեւէ մեկը հիմա չի կարող հավակնել, որ ինքը ինձ հեռացրեց, կամ պատժեց, դա առնվազն մանկամտություն է: Ես դեռեւս նախկին նախագահին 2016 թվականին կայացած հանդիպման ժամանակ ասել եմ, որ չեմ ուզում շարունակել, քանի որ չեմ ուզում ասոցացվեմ, մեկ աթոռ մեկ պաշտոնի հետ»,-ասաց նա:

Ինչ վերաբերում է ծառայողական մեքենայից օգտվելու մեղադրանքներին, ապա Դեմոյանը նշեց, որ երկու անգամ է օգտվել, այն էլ թանգարանի կարիքների համար, թանգարանի համար գրքեր են բերել, որից հետո կապվել է ԿԳՆ իրավաբանական վարչության պետի հետ եւ խնդրել պարզաբանել, թե ինչ կարող են անել ծառայողական մեքենայի հետ, ով էլ խորհուրդ տվել է, ավելորդ բարդություններից խուսափելու համար այն կայանել թանգարան մուտքի տարածքում:

Նա նշեց, որ չի կարող իր կապերը կտրել, քանի որ իր կյանքի երիտասարդ տարիներն այստեղ է անցկացրել եւ չէր կարող Վաշինգթոնից բացառիկ նյութեր չբերեր եւ չի կարող չմասնակցել աշխատանքներին, եթե դրա կարիքը լինի։

Դեմոյանը շեշտեց, որ հոգաբարձուների խորհրդի անդամների ցանկը ձեւավորվել է ԿԳ նախարարի ցանկությամբ։ Իսկ խորհրդի նախագահ ընտրված Ռայմոնդ Գեւորգյանին անդրադառնալով ասաց, որ նա աչքի է ընկել միայն Հայոց ցեղասպանության թանգարան–ինստիտուտի ցուցադրությունը  խափանելու ցանկությամբ։  Նա պատմեց, թե այդպիսի փորձ է եղել Փարիզում, երբ Հայոց ցեղասպանության 100–ամյակի տարելիցի կապակցությամբ Դեմոյանը ցուցահանդես է կազմակերպել  Փարիզի քաղաքապետարանում։