Միջադեպ Բիշքեկում՝ վարչապետների հավաքին

ԼՐԱԳԻՐ / Բիշքեկում Եվրասիական միության անդամ երկրների վարչապետների հավաքի ժամանակ Ռուսաստանի վարչապետ Դմիտրի Մեդվեդևը սկանդալային հայտարարություն է արել: Նա ԵՏՄ երկրներին կոչ է արել ռուսական գազի գնի հաշվարկներում «չտանջվել». եթե անդամ մի շարք երկրներ չմտնեին Միություն, գազ կգնեին եվրոպական գներով: «Այստեղ ոչ ոք ոչ ոքի ուժով չի պահում», ասել է նա:
Սա Բիշքեկի հանդիպման «մեխն» էր: Այլ խոսքով, Մեդվեդեւը հայտարարել է, որ ԵՏՄ-ն ստեղծվել ու պահվում է շանտաժի միջոցով: Այլ գործիք չկա եւ չի կարող լինել. Մոսկվան առաջարկելու բան չունի՝ տեխնոլոգիաներ, հաղորդակցություններ, ներդրումներ եւ այլն: Ավելին, Ռուսաստանն ինքն ունի այդ ամենի կարիքը:
Եվ ԵՏՄ մասնակիցներին իր «ծիրում» պահելու համար կիրառում է ոչ միայն էներգետիկ, այլեւ տարբեր բնույթի սպառնալիքներ: Հայաստանի դեպքում դա Ադրբեջանին զինելն է ու Ղարաբաղի դեմ հարձակումները հովանավորելը, Ղազախստանի ու Բելառուսի դեպքում՝ տարածքային հավակնությունները, եւ այսպես շարունակ:
ԱՄՆ նախկին պետքարտուղար Հիլարի Քլինթոնը մի առիթով ասել էր, որ ՌԴ իշխանությունը միջազգային գործերում, պետությունների հետ հարաբերություններում իրեն պահում է «խուլիգանի պես»:
Մեդվեդեւի այս հայտարարությունն ըստ էության տեղավորվում է այդ գնահատականի մեջ: Ընդ որում, դա հնչում է մամուլի ներկայությամբ, եւ պատկերացնել կարելի է, թե ինչ զրույցներ են տեղի ունենում «փակ ռեժիմում»:
Հետաքրքիր է, որ Բիշքեկի հավաքի նախօրեին Սերժ Սարգսյանը Եվրանյուզին տված հարցազրույցում ասել էր, թե մի գիշերում ԵՏՄ մտնելու որոշման պատճառը եղել է գազի գինը: Փաստացի, Մեդվեդեւը հաստատել է Սերժ Սարգսյանի բացատրությունը, եւ երկուսով էլ խոստովանել են շանտաժի հանգամանքը:
Պետք է նշել, որ Հայաստանի դեպքում «խուլիգանությունը» միայն այդտեղ չի ավարտվում: Թեեւ Հայաստանը գազը սահմանին ստանում է իսկապես ցածր գնով, սահմանից այս կողմ այն գրեթե հավասարվում է միջազգային գներին, եւ հայաստանցի սպառողն այս տեսակետից որեւէ «եվրասիական պրեֆերենցիա» չի զգում:
Փոխարենը, ՀՀ նախկին ու ներկա վարչապետները հայտարարում են, որ ամեն ինչ պետք է անել, որ Գազպրոմի շահույթը չնվազի:
Բիշքեկի հավաքին մասնակցել է նաեւ ՀՀ վարչապետ Կարեն Կարապետյանը, ով վստահություն է հայտնել, որ մասնակիցները «դեռեւս լիարժեք չեն օգտագործում այն ներուժը, որը ենթադրում է Եվրասիական տնտեսական միությունը»:
Կարեն Կարապետյանը հայտարարել է նաեւ, որ ԵՏՄ-ն ճիշտ հարթակ է, «Հայաստանը մտադիր է հետևողական ու համակարգված աշխատել այդ ուղղությամբ»: