Ուկրաինային հաջողվել է ՌԴ-ից «կտոր պոկել»․ ի՞նչ իրավիճակ է բախման էպիկենտրոնում. հայացք ներսից

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

2.5 տարվա ընթացքում առաջին անգամ Ուկրաինայի ԶՈՒ-ին հաջողվեց գործողություններ իրականացնել հենց ՌԴ տարածքում։ Ռուսաստանի Դաշնության Կուրսկի, Լիպեցկի շրջանները, այսօր նաև Բելգորոդի շրջանները գտնվում են ռմբակոծության տակ։ 

Ուկրաինական կողմը ակտիվ տեղեկություններ է շրջանառում օկուպացված տարածքների, հազարավոր գերեվարված զինվորականների և խաղաղ բնակիչների մասին։

ՌԴ-ն հակահարված տվել է և շարունակում է պայքարել, որպեսզի կասեցնի ուկրաինացիների հնարավոր առաջխաղացումը: Շատ են տեղեկությունները Կուրսկի շրջանի բազմաթիվ բնակիչների մահվան մասին։ 

Միևնույն ժամանակ, ՌԴ նախագահը չի ցանկանում բանակցել Ուկրաինայի հետ, նա, մասնավորապես, նշել է․ «Ի՞նչ բանակցությունների մասին կարելի է խոսել այն մարդկանց հետ, ովքեր հարձակվում են քաղաքացիական անձանց, քաղաքացիական ենթակառուցվածքների վրա կամ փորձում են վտանգներ ստեղծել միջուկային էներգիայի օբյեկտների համար»։

Դեռ մեկ շաբաթ առաջ, երբ իրավիճակը նոր էր սրվել, MediaHub-ը զրուցեց ռուս քաղաքագետ Վիկտոր Սապրիկայի հետ, որը հերքեց, թե օկուպացված տարածքներ կան։ Սակայն, այսօր MediaHub-ը կապ հաստատեց Բելգորոդի և Կուրսկի շրջանի խաղաղ բնակիչների հետ, որոնք պնդում են՝ վիճակը բավականին ծանր է։ Եվ, ըստ մեր զրուցակցի, օկուպացված տարածնքներ, այո՛, արդեն կան։

«Առաջին օրերին նրանք կարողացել էին ճեղքել և ներխուժել ՌԴ տարածք, բայց մենք չվախեցանք, մտածելով, որ մեկ օրվա ընթացքում ամենը կլուծվի, սակայն, ռազմական բախումները շարունակվում են, սահմանամերձ գյուղերը  և փոքր բնակավայրերը գտնվում են օկուպացիայի տակ: Այսինքն, ուկրաինական ԶՈՒ–ին հաջողվել է Կուրսկի տարածքից «կտոր պոկել»: Եվ այն տեղեկությունը, որ 28 բնակավայր գտնվում է հակառակորդի վերահսկողության տակ, իմ կարծիքով սխալ է, այն ավելի շատ է, քան 28 բնակավայրը: Ես անձամբ չեմ տարհանվել Կուրսկի շրջանից, վիճակը այդքան վատ չէ ամբողջ տարածաշրջանում, ինչպես ներկայացնում են»,– նշեց Կուրսկի բնակիչը։ 

Մեր զրուցակիցը նշեց, որ ՌԴ տարածք ներխուժած ուկրաինական ԶՈՒ   զինվորականները իրականում վարձկաններ են Ֆրանսիայից, Անգլիայից և այլ եվրոպական երկրներից, նրանց շարքերում ուկրաինացիներ գրեթե չկան։

Սահմանամերձ Բելգորոդի մեկ այլ բնակիչ իր հերթին նշեց, որ այսօր երեք անգամ Բելգորոդի տարածաշրջանում հայտարարվել է հրթիռային վտանգ։

«Չնայած, որ երեք անգամ հրթիռային վտանգ էր հայտարարվել՝ Բելգորոդում ավելի հանգիստ է, քան Կուրսկում։ Կուրսկում մարտեր են գնում, մարդիկ զոհվում են, Բելգորոդը սովոր է՝ արդեն 2.5 տարի է գրեթե ամեն օր հրթիռակոծություն, կրակոցներ, հրթիռային վտանգ է հայտարարվում»,– նշեց մեր զրուցակիցը։

Նա նշեց, որ ուկրաինական ԶՈՒ–ն փորձել է ներխուժել ՌԴ տարածք նաև Բելգորոդի կողմից, սակայն, ռուսական զորքերը չեն թողել։

Թե՛ Կուրսկից, թե՛ Բելգորոդից մեր զրուցակիցները MediaHub-ի հետ զրույցում նշեցին, որ վիճակը սահմանին բարդ է, Կուրսկի բնակչությանը տարհանվում են, սակայն, նրանք հավատում են, որ Ուկրաինայի ԶՈՒ–ն հետ է «շպրտվելու»։ Թեև տեղեկություններ են շրջանառվում, որ Բելգորոդի տարածքից էլ են տարհանում բնակիչներին, սակայն, մեր զրուցակիցը նշեց, որ այդպես չէ և Բելգորոդում, համեմատաբար, վիճակը կայուն է։

Երկուսն էլ վստահ են, որ Կուրսկի Սուջա քաղաքը դարձել է թիրախ, որտեղ ամենաշատն են տեղի ունենում ուկրաինական կազմավորումների հարձակումները, քանի որ այնտեղ գազաբաշխման համակարգն է տեղակայված, որով գազ է մատակարարվում դեպի Եվրամիություն։

Հիշեցնենք, օրերս տեղեկություններ տարածվեցին, որ ուկրաինական ԶՈՒ–ն ներծուժել է ՌԴ տարածք, իսկ Կուրսկի մարզում օգոստոսի 6-ից շարունակվող մարտերի ընթացքում առաջին անգամ Ուկրաինայի իշխանությունները պաշտոնապես ընդունել են, որ այնտեղ գործողություններ են իրականացնում։ Ուկրաինայի նախագահ Վոլոդիմիր Զելենսկին հայտարարել է, որ Կիևը «պատերազմը տեղափոխում է ագրեսորի տարածք»։ ՌԴ պաշտոնական տեղեկատվության համաձայն՝ 28 բնակավայր գտնվում է հակառակորդի վերահսկողության տակ, Ուկրաինայի ԶՈւ հարձակումների հետևանքով զոհվել է 12 խաղաղ բնակիչ, վիրավորվել՝ 121 մարդ: Կուրսկի նահանգապետի պաշտոնակատար Ալեքսեյ Սմիրնովը հայտարարել է, որ Ուկրաինայի Զինված ուժերը Կուրսկի մարզի Բելովսկի շրջանում քիմիական զենք են կիրառել, հակառակորդի ներթափանցման խորությունը 12 կիլոմետր է, լայնությունը ճակատում՝ 40 կիլոմետր:

Մարիաննա Արամյան