«Քուրդ զինյալներ Սյունիքում». Թուրքիան ստեղծում է ագրեսիայի պատրվակ
BlogՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Թուրքիայի պետական TRT Haber֊ը հոդված է հրապարակել, որն ազգային անվտանգության սպառնալիք է Հայաստանի համար։
TRT Haber-ում չի կարող հրապարակվել որևէ հոդված, որի հրահանգը չի տրվել Էրդողանի գրասենյակից կամ İletişim Başkanlığı-ից, որը կարող ենք անվանել Թուրքիայի նախագահականի քարոզչության վարչություն: Եթե անգամ հրահանգն ուղիղ չի իջել, ապա հոդվածն առնվազն ուղղորդվել ու վերահսկվել է:
Հետևաբար, այն ինչ նշված է այս հոդվածում, պետք է զննել ուշադրությամբ ու անել հետևություններ, որովհետև առավել նկատելի կերպով ուրվագծվում է Հայաստանի դեմ Թուրքիայի գործողությունների պլանը:
Հոդվածի գրեթե ամբողջական թարգմանությունը և բոլոր կարևոր կետերը, որոնք բաց թողնել չի կարելի, կարող եք կարդալ Ոսկանապատում՝ շուտով։
Այստեղ՝ ամենավտանգավորը։ Հոդվածագիրը նշում է, թե տարածաշրջանի վերջին զարգացումները ցույց են տալիս, որ որոշ արևմտյան տերություններ, նաև Ֆրանսիան և Իրանը, իռացիոնալ գործունեություն են ծավալում Զանգեզուրի միջանցք կոչվածի բացումը կանխելու համար։ Հատկապես Ֆրանսիան և Իրանը միջանցքում տեղակայում են ահաբեկչական խմբավորումներ՝ ֆինանսավորելով և զինելով այդ անձանց:
Ըստ TRT Haber-ի քարոզչության, Սյունիքում տեղակայված «ահաբեկիչների» թիվը հասնում է 10 հազարի, ու այս թվին ավելացնում են ամենավտանգավորը՝ իբր նրանց մեջ նաև քուրդ զինյալներ են PKK-ից, որը Թուրքիայի տարածքում գործող քրդական բանվորական/աշխատավորական արգելված, ահաբեկչական հայտարարված կուսակցությունն է, և YPG- ից, որը Սիրիայի տարածքի զինյալ քրդերն են:
Անկարայից ահաբեկիչ են անվանում նաև Երկրապահի դիրքապահներին, հայկական այլ՝ ավելի փոքր միավորների, որոնք որոշ գործողություններ են իրականացնում ուղղված սահմանի պաշտպանությանը, կամ անգամ որևէ գործողություն չեն անում (ՈՄԱ, Սասնա Ծռեր, Բևեռ և այլն):
«Զանգեզուրի միջանցքում տեղաբաշխված այս ահաբեկիչներին օրական վճարվում է 12 դոլար, վճարում են Ֆրանսիան և հայկական սփյուռքը», - նշում է թուրքական թերթը:
Գնում են ավելի հեռու՝ հավելելով, թե քրդերի ուղիղ ներկայությունից բացի «Զանգեզուրի տարածքում տեղակայված ահաբեկիչներն ու ավազակախմբերը լուրջ աջակցություն են ստանում PKK ահաբեկչական կազմակերպությունից»: Ընդ որում քրդերից բացի այս գործում մեղադրում են նաև Իրանին և Ֆրանսիային՝ գրելով, թե այդ «ահաբեկիչներին» Ֆրանսիայի և Իրանի զինվորականները սովորեցնում են դիվերսիաների, սպանությունների, ականապատելու և հետախուզության հմտություններ:
Մեղադրանքները պարզապես գրված են՝ առանց որևէ հիմնավոր ապացույցի, սակայն նման մեդիահրապարակումները, որպես կանոն, ինքնանպատակ չեն լինում: Լինում են մեծ պլանի մի մասը: Թուրքիան ստեղծում է միջավայր և տրամադրություններ՝ Հայաստանի դեմ գործողությունների համար:
Ընդ որում թուրքական քարոզչական այս գրոհը առաջին անգամ նկատելիորեն սկսեց ուրվագծվել Ներքին Հանդում, որտեղ բախումների հետևանքով հայկական կողմն ունեցավ 4 զոհ: Ու այդ բախումներից հետո Բաքվից սկսեցին ահաբեկիչներ հայտարարել երկրապահի դիրքապահներին:
Սա թուրքական ձեռագիրն է՝ հայտնի դեռ հենց Թուրքիայի ներսից, նաև Սիրիայից և Իրաքից, «գտնում են ահաբեկիչներ» և իրականացնում «հակաահաբեկչական գործողություն»:
Նույնը տեղի ունեցավ Արցախում: Արցախի պաշտպանության բանակը հայտարարեցին «ահաբեկչական» ու սեպտեմբերի 19-ի հարձակումը կոչեցին «հակաահաբեկչական գործողություն»:
ՀՀ արտաքին քաղաքականության այս կերպի մեջ ոչինչ չի խանգարելու Թուրքիա-Ադրբեջան զույգին նույնն անել Հայաստանի ԶՈՒ կամ ՀՀ տարածքը պաշտպանող որևէ միավորի դեմ։