Կորոնավիրուսի դեմ բրիտանական «AZD1222» պատվաստանյութը կմիացվի ռուսական «Спутник V»-ին

Բրիտանական «AstraZeneca» դեղագործական ընկերությունը հայտնել է իր «AZD1222» և ռուսական «Спутник V» պատրաստուկների կոմբինացիայի կլինիկական հետազոտությունների մեկնարկի մասին: Նյութը վերցրել ենք lenta.ru կայքից:

«AZD1222» պատվաստանյութը մշակվել է «AstraZeneca»-ի հետազոտողների և Օքսֆորդի համալսարանի գիտնականների կողմից՝ ադենովիրուսային վեկտորի հիման վրա: Ներդրված կորոնավիրուսային S-սպիտակուցով ադենովիրուսային վեկտորներն ընկած են նաև երկբաղադրիչ «Спутник V» պատվաստանյութի հիմքում: Ադենովիրուսները սովորական մրսածություն են առաջացնում, իսկ S-սպիտակուցը հատուկ բաղադրիչ է SARS-CoV-2-ի համար և կորոնավիրուսին թույլ է տալիս ներթափանցել բջիջներ: Պատվաստանյութը մարդու իմունային համակարգը մարզում է՝ ճանաչելու կորոնավիրուսը՝ նրա մակերևույթի S-սպիտակուցով և կանխելու COVID-19-ի զարգացումը:

«Спутник V»-ի կլինիկական փորձարկումներից հետո, որոնք պատրաստուկի ավելի քան 90% արդյունավետություն են դրսևորել, Ն. Ֆ. Գամալեյի անվան համաճարակաբանության և մանրէաբանության ազգային հետազոտական կենտրոնի գիտնականները, «AZD1222»-ի արդյունավետության բարձրացման համար, «AstraZeneca»-ին առաջարկել են օգտագործել իրենց պատվաստանյութի բաղադրիչներից մեկը: Տեղեկատվության համաձայն՝ փորձարկումները կսկսվեն մինչև 2020 թվականի ավարտը:

Նյութը հրապարակման պատրաստեց Լիլիթ Ամիրաղյանը