Որ մասնագիտություններն են առավել պահանջված

Առաջին / Հայաստանում ավարտվել է միասնական քննությունների առաջին փուլը և մեկնարկել է երկրորդ փուլի դիմում-հայտերի ընդունման գործընթացը։ Գնահատման և թեստավորման կենտրոնի նախագահ Արա Իսպիրյանը առաջին փուլի րնդհանուր արդյունքներից դժգոհ չէ, դրանք նորմայի սահմաններում են։

«Առաջին լրատվական»-ի հետ զրույցում վերջինս տեղեկացրեց, որ այս տարի բարձր արդյունքներ են գրանցվել հատկապես օտար լեզուներ առարկաներից, որտեղ միջին միավորը 15 բալի սահմաններում է, իսկ անբավարար ստացողների քանակը մոտ 6 % է կազմում, ֆիզիկա և ռուսաց լեզու առարկաների դեպքում միջին միավորը 10-10․5 բալ է եղել, սակայն ամենաշատ անբավարար ստացողները եղել են հենց այս առարկաներից՝ շուրջ 20-24 %, մաթեմատիկայից անբավարար ստացողների թիվը կազմել է շուրջ 9․5 %, իսկ մնացած առարկաների միջին միավորները մոտ 13-13․5-ի սահմաններում է։ Դիմորդների ընդհանուր պատրաստվածությունը քննություններին, Արա Իսպիրյանը դրական գնահատեց՝ ասելով, որ այս տարի նրանք բավականին հասուն են․

«Այսինքն՝ քննասենյակներում չէիր նկատի ինչ-որ մեկին, որ փորձում է խանգարել մյուսներին, կամ արտագրել, կամ պարզապես եկել է բախտը փորձելու, հակառակը՝ քննական պրոցեսը շատ հարթ է ընթացել, և յուրաքանչյուրն աշխատել է իր թեստի վրա՝ առանց լարվածության մթնոլորտ ստեղծելու։
Հիմա արդեն սկսել ենք նաև երկրորդ փուլի հայտերի ընդունելությունը՝ դրանք միջին մասնագիտական հաստատությունների և քոլեջների դիմորդներն են, ինչպես նաև բանակից զորացրված երիտասարդները, Ռուսաստանի, Վրաստանի կամ այլ երկրների երեխաները, ովքեր ցանկանում են ուսումը շարունակել Հայաստանում, ինչպես նաև երկրորդ փուլի մեջ են մտնում բոլոր այն երեխաները, ովքեր հիվանդության պատճառով չեն կարողացել մասնակցել քննությունների առաջին փուլին»,- նշեց ԳԹԿ տնօրենը։

Քննությունների թեստերն այս տարի ևս նախորդ տարիների նման կազմվել են շտեմարաններում առկա առաջադրանքների հիման վրա, սակայն փոքր-ինչ փոփոխությամբ։ Այս համատեքստում Արա Իսպիրյանը ընդգծեց, որ վերջին տարիներին իրականացված փոփոխությունը վերաբերում է հիմնականում մաթեմատիկային և բնագիտական մյուս առարկաներին։ Դրանց թվին այս տարի ավելացել է նաև հայոց լեզուն։

«Շտեմարաններից նույնությամբ չի վերցվել առաջադրանքը, այլ այն ենթարկվել է թվային արժեքի փոփոխության։ Դա արվել է այն նպատակով, որպեսզի առաջադրանքը բացառապես անգիր անելու հնարավորությունը բացառվի, այլ վերլուծելու կարողություն ունենան, այսինքն՝ պետք է իմանան, թե ինչպես է հարկավոր խնդիրը լուծել, այլ ոչ թե առաջադրանքի համարն ու ճիշտ պատասխանը անգիր անեն և գան մեխանիկորեն դա նշեն։ Իսկ ինչ վերաբերում է ընդհանրապես թեստերի բարդությանը կամ մակարդակին, ապա այս տարի դրանք բավականին հաջող էին թե՛ բովանդակային առումով, թե՛ ընթացակարգային․ այս տարի դիմում-բողոքներ չենք ստացել»։

Գաղտնիք չէ, որ այս տարի դիմորդների թիվն է կտրուկ նվազել, ինչի արդյունքում էլ շատ հեշտ է դարձել ցանկացած պետական բուհ ընդունվելը։ Նախորդ տարվա տվյալների հետ համեմատած՝ այս տարի դիմորդների թիվը նվազել է շուրջ 1500-ով։ Արա Իսպիրյանի պնդմամբ՝ դիմորդների թվի նվազումը որևէ կերպ չի անդրադարձել թեստերի որակի և բարդության վրա։ Անդրադառնալով պետական բուհ ընդունվելու համար խոչընդոտներ չլինելու հանգամանքին՝ բանախոսը նշեց․

«Այստեղ մասնագիտությունների խնդիրն է առաջ գալիս։ Բոլոր բուհերն էլ կունենան մասնագիտություններ, որոնք շատ պահանջարկված են և տեղերը կլինեն մրցութային, մրցակցությունը բարձր կլինի այդտեղ, և, բնականաբար, կլինեն նաև մասնագիտություններ, որտեղ կան թափուր տեղեր կամ ոչ այդքան բարձր միավորներով հնարավոր կլինի ընդունվել։ Այդպես եղել է նաև նախորդ տարի»։
Հարցին, թե հատկապես որ մասնագիտություններն են ամենաշատն այս տարի պահանջարկ վայելում դիմորդների շրջանում, Արա Իսպիրյանը պատասխանեց․

«Այս տարի ավելի շատ տեղեկատվական տեխնոլոգիաների մասնագիտությունների գծով տեղաշարժ կա, այսինքն՝ այստեղ հաստատ մրցութային է լինելու։ Դա ծրագրավորման բաժինն է, տեղեկատվական անվտանգությունը և այլն, այսինքն՝ կարելի է ասել, որ պոլիտեխնիկական, ինժեներական մասնագիտությունների պարագայում աշխուժություն է նկատվում, և պոլիտեխնիկական համալսարանում դիմորդների քանակն անցյալ տարվա համեմատ չի էլ պակասել։ Դեռևս մրցութային են համարվում նաև իրավագիտություն, միջազգային հարաբերություններ, տնտեսագիտություն, բուժական գործ մասնագիտությունները, բայց կան նաև, օրինակ, քիմիա, կենսաքիմիա և բնագիտական նմանատիպ առարկաների մասնագիտություններ, որտեղ արդեն ակնհայտ է, որ կլինեն թափուր տեղեր»։

Արա Իսպիրյանը համաձայն չէ կրթության ոլորտի շատ փորձագետների այն տեսակետների հետ, որ միասնական քննություններն անիմաստ են և երկարաժամկետ առումով մնայուն գիտելիք չեն ապահովում, հակառակը՝ նա պնդեց, որ միասնական քննությունների համակարգն այսօր այլընտրանք չունի և ամբողջ հանրության կողմից այն նույնիսկ լիովին վստահություն է վայելում։ Նրա կարծիքով՝ թեստային տարբերակով գնահատական տալը այսօր ամբողջ աշխարհում ընդունված մոդել է։

«Ութսուն հարցի միջոցով դու կարողանում ես ամբողջապես բացահայտել տվյալ առարկայի վերաբերյալ երեխայի պատկերացումներն ու գիտելիքները։ Իսկ նախորդ համակարգում՝ ընդամենը մեկ կամ երկու հարց էիր տալիս՝ այդտեղ երեխայի բախտը բերում էր՝ իր իմացած հարցերն էին, կամ էլ չէր բերում ու անբավարար էր ստանում։ Մի առավելություն էլ սա ունի, որ անմիջապես քննությունից հետո երեխան կարող է պատճենահանված ձևաթուղթը ձեռքին իր դասատուների, դասախոսների հետ միասին ստուգել թեստի ճիշտ պատասխանները և հասկանալ, թե ինչքան միավոր է հավաքել, որն անբեկանելի է։

Իսկ ինչ վերաբերում է կրկնուսույցներին, որ նրանց գումար են վճարում, հավելյալ պարապում են և այլն, ապա այնպես չէ, որ նախորդ համակարգում կրկնուսույցներ չեն եղել, բացի դրանից, շտեմարանների առկայության պարագայում դիմորդները հնարավորություն ունեն այդ առաջադրանքներով ինքնուրույն զբաղվել կամ իրենց ուսուցիչների հետ պարապել և հավելյալ գումարներ չվճարել»,- ասաց Իսպիրյանը։

Վերջինս անդրադարձավ նաև Հայաստանում ներդրված 12-ամյա կրթության գաղափարի ճիշտ կամ սխալ լինելու դիտարկմանը, ինչի արդյունքում, ըստ կրթության ոլորտի ներկայացուցիչների, բազմաթիվ խնդիրներ են ծագել թե՛ դիմորդների, թե՛ բուհերի համար։

«12-ամյա կրթության մասին իմ անձնական կարծիքը կարող եմ հայտնել, որ դա Հայաստանի համար անհրաժեշտություն էր, ինչպես նաև դա ինտեգրվելու նպատակ ունի, որպեսզի ամբողջ աշխարհում մեր վկայականի ճանաչված լինելու խնդիրը լուծի»,- եզրափակեց նա։